Шаҳло Эшонова, муҳаррири шуъбаи иқтисод ва иҷтимои рӯзномаи “Ҷавонони Тоҷикистон” дар озмуни муштараки Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ва Иттифоқи журналистони Тоҷикистон дар бахши матбуоти даврӣ сазовори ҷойи дуввум гардида, бо диплом ва туҳфаи хотиравӣ қадрдонӣ гардид.

Озмуни мазкур бахшида ба Рӯзи коҳиши хавфи офатҳои табиӣ гузаронида шуда, дар се номинатсия – матбуоти даврӣ, радио ва телевизион ва сомонаҳои иттилоотӣ се нафарӣ ғолибон муайян шуданд.

Ҳамин тавр, дар бахши матбуоти даврӣ ҷойи аввалро Ҷаҳонгиршоҳ Рустамшоҳ, мухбири минтақавии ҳафтаномаи “Хатлон”, ҷойи дуввумро Шаҳло Эшонова, муҳаррири шуъбаи иқтисод ва иҷтимои рӯзномаи “Ҷавонони Тоҷикистон” ва ҷойи сеюмро Фарзона Муродӣ, мухбири нашрияи “Пайк” дар вилояти Суғд ба даст оварданд.

Дар бахши телевизион ва радио бошад, Вера Исмоилова, директори Ширкати телевизион ва радиои “Мир” сазовори ҷойи аввал, Нигина Давронзод, муҳаррири радиои “Садои Душанбе” сазовори ҷойи дуввум ва Фарзона Шамсиева, муҳаррири ширкати телевизион ва радиои “Симои мустақил - 1”-и шаҳри Хуҷанд сазовори ҷойи сеюм гардиданд.

Дар бахши сомонаҳои иттилоотӣ Лайло Тоҳирӣ, АМИТ “Ховар”, Абубакри Файзалӣ, сомонаи “Mir24.tv” ва Амонҷон Муҳиддинов, сомонаи “ Your.tj” зинаҳои якуму дуюму сеюмро соҳиб шуданд.