Дар шаҳри Душанбе баҳри пешгирии паҳншавии бемории сироятии коронавирус 196 адад зергурӯҳҳои корӣ иборат аз 693 нафар таъсис ёфта, аз ҷониби онҳо ҷиҳати риояи ҳатмии пӯшидани ниқоб, дуруст нигоҳ доштани фосилаи муайян миёни одамон ва дигар қоидаҳои беҳдоштӣ аз 1 июн то 1 июли соли ҷорӣ бо фарогирии 115,0 ҳазор нафар корҳои тарғиботию ташвиқотӣ ва фаҳмондадиҳӣ баргузор карда шудааст.

Ин нуктаро имрӯз, 24-июл масъулини шаҳри Душанбе зимни нишасти матбуотӣ ба рӯзноманигорон баён намуданд.

Дар идома вобаста ба фаъолияти гурӯҳҳои кории пойтахти кишвар ҷиҳати пешгирии бемории сироятии коронавирус гуфта шуд, ки аз ҷониби намояндагони ин гурӯҳҳо дар шаҳри Душанбе 38,7 ҳазор нафар сокинон ва меҳмонони бе ниқоб гашту гузоркунанда муайян гардида, ба онҳо ниқобҳои яккарата ва бисёркарата тариқи ройгон дастрас карда шуданд.

Таъкид гардид, ки бояд ҳар як нафар дар ин давраи ҳассос, яъне пандемияи коронавирус қоидаҳои беҳдоштиро риоя намояду саҳми хешро дар пешгирии бемории сироятии мазкур гузорад.