Таҳти ин унвон дар толори Донишгоҳи давлатии ҳуқуқ, бизнес ва сиёсати Тоҷикистон конференсияи илмӣ ва маҷлиси тантанавӣ ба ифтихори Рӯзи Президенти Ҷумҳурии Тоҷикистон баргузор гардид.

Дар чорабинӣ намояндаи МИҲД вилояти Суғд Мирзоғуфрон Ғафуров, сардори Раёсати кор бо ҷавонон ва варзиши вилояти Суғд Мирзоқосим Каримзода, муовини раиси шаҳри Хуҷанд Фирӯза Нуруллозода, муовини раиси КИ ҲХДТ дар вилояти Суғд Аминҷон Шарифзода ва ректори Донишгоҳи давлатии ҳуқуқ, бизнес ва сиёсати Тоҷикистон Шарифзода Муъмин Машокир иштирок ва баромад карданд.

“Боиси ифтихор аст, ки Пешвои муаззами миллат ҳамчун сиёсатмадори сатҳи ҷаҳонӣ бо мавқеи устувор ва матонати беназир, посдории таърих ва тамаддуну фарҳанги куҳанбунёди дирӯзу имрӯзи миллатамон на танҳо халқи тоҷикро ба оромию осоиштагӣ расониданд, балки дар суботи тамоми минтақа низ саҳми бузург гузоштанд”, - гуфт ректори донишгоҳ, профессор Муъмин Шарифзода.

Ҳамчунин илова шуд, ки бо баргузории рӯзи оғози Иҷлосияи XVI Шӯрои Олии Ҷумҳурии Тоҷикистон тавъам омадани ин санаи фархунда рамзист, зеро дар ҳамин иҷлосияи таърихӣ Сарвари давлат интихоб гардида, дар бунёди низоми давлатдории Тоҷикистони соҳибистиқлол, барқарории сохти конститутсионӣ, ба даст омадани сулҳу ваҳдати миллӣ саҳми беназир гузошта, миллатро аз парокандагӣ, давлатро аз нестшавӣ ва халқро аз ҷанги шаҳрвандӣ раҳо намуда, дар маҷмуъ барои рушди сиёсӣ, иқтисодию иҷтимоӣ ва таърихию фарҳангии Тоҷикистон хизматҳои бузург анҷом доданд.

Дар идома меҳмонон ва устодони донишгоҳ баромад карда, перомуни ҳаёту фаъолият ва заҳматҳои Пешвои миллат дар раванди бунёдкориву созандагӣ ва аз давлати ҷангзада ба кишвари воҳиду тараққиёфта табдил додани Тоҷикистон маърӯза карданд.

Дар қисмати баъдии маҷлиси тантанавӣ ба ифтихори Рӯзи Президенти Ҷумҳурии Тоҷикистон кормандону устодони донишгоҳ бо кӯмакпулиҳо ва як зумра донишҷӯён, ки дар озмуну олимпиада ва мусобиқаҳо иштироки фаъол намуда, соҳиби мақоми ифтихорӣ шудаанд, бо ифтихорномаву туҳфаҳои раёсати донишгоҳ қадрдонӣ гардиданд. Ҳамчунин, чанде аз кормандон ва устодони донишгоҳ бо сипосномаҳои Раёсати кор бо ҷавонон ва варзиши вилояти Суғд сарфароз гардонида шуданд.