ҶОМЕА
Панҷшанбе 06 Август 2020 09:27
6375
Саҳни мактаб-интернати рақами 1-и шаҳри Душанбе ободу зебост. Дар даромадгоҳи мактаб маро посбон пешвоз гирифт. Чун фаҳмид, ки рӯзноманигорам, пас аз каме интизорӣ маро ба утоқи Маликмаҳмад Маликов, муовини директор оид ба таълиму тарбияи муассиса роҳнамоӣ кард. Баробари дохили утоқ шудан, муовин аз доштани мактуб пурсон шуда, изҳор дошт, ки бе он иҷозат нест. Баъдан маро бо куратори муассиса Сайфиддин Файзиддинов шинос намуду пас аз иҷозат гирифтан  аз куратор ҳамроҳи сармураббӣ Ҷонибек Расулов ба шиносоӣ бо вазъи таълиму тарбияи муассиса пардохтем. 

Ба аввалин утоқе, ки даромадем он ҷо хонандагон машғули шашкаву шоҳмотбозӣ буданд. Миёни онҳо Томирис Исоева, хонандаи синфи 7 ҳамроҳ бо дигар ҳамсолонаш аз намуди шоҳмот бозӣ мекард. Томирис духтари фаъол аст ва бисёри вақти худро дар ин толори варзишӣ мегузоранад. Баъди суҳбат бо шоҳмотбозони муассиса ба синфхонаи истироҳатӣ даромадем. Дар он ҷо кӯдакон машғули тамошои оинаи нилгун буданд. Ҳангоми моро дидан ҳама якҷоя аз ҷо хеста, бо одобона салом доданд. Чеҳраҳояшон ширину кушода буд. Дар бари яке аз онҳо Шукрона Закиева, ки синфи як будааст, нишастам. Ҳамроҳ суҳбат намудем, бисёр фаъол буду дар васфи Модар- Ватан шеър қироат кард. Дигар кӯдакон низ якҷоя маҳорати худро нишон доданд. 

Дар ошёнаи 3-юм китобхонаи муассиса ҷойгир аст. Ҳангоми ба он ворид гардидан, хонандагонро машғули китобхонӣ дарёфтем. Фирӯза Нуралиева, китобдори муассиса се сол аст ин ҷо фаъолият дорад. Ӯ зикр намуд, ки ҳамаи кӯдакон аъзои китобхона буда ва метавонанд вақти холигии худро дар ин ҷо ба китобхонӣ сарфа намоянд. 

Дар кунҷи китобхона духтараке китоб мехонд. Ӯ Зебо Бобоева, хонандаи синфи 9 мебошад. Зебо нуҳ сол аст, ки дар ин муассиса зист дошта, таълиму тарбия мегирад. Аз замони хурдсолияш шавқу завқи китобхонӣ дошту ҳар лаҳзаро сарфи мутолиа менамояд. Ӯ то имрӯз беш аз 600 китоби бадеиро мутоила намудааст ва дар лоиҳа-озмуни нашриёти “Ирфон” иштирок намуда, сазовори ҷойи аввал ва сипосномаҳои вазоратҳои маориф ва фарҳангро ба даст овардааст. 

Ба синфхонаҳо ворид гардидем. Ҳама бо таҷҳизоти таълимӣ муҷаҳҳаз аст. Дар шафат бунгҳои тиббӣ мавҷуд мебошад. Ҳар нафар аз хонандагони муассиса пайваста таҳти назорат буда, дар ҳолати пайдо шудани беморие дарҳол пайи дармон бахшидани он мешаванд. 
Ҷамолиддин Холов, сарошпази ошхона бо сару либоси сафеди тоза моро қабул кард. Сарошпаз чунин таъкид намуд: “Ошхонаи муассиса наву замонавист ва дорои 450 ҷойи нишаст мебошад. Ман ҳамроҳи ҳамкасбонам ҳамеша дар хизмати кӯдакони ятими ин муассиса қарор дорем”. 

Дар умум шароити муассиса хеле хуб ба назар мерасид. Ё шояд як рӯз пеш аз омадани мо чунин омодагии хуб дидаанд. Зеро рӯзи аввали рафтанамон иҷозати даромадан ба муассисаро гирифта натавонистем. Ҳарчанд ки мувофиқи Қонун “Дар бораи матуботи даврӣ ва дигар васоити ахбори омма” дастрасии рӯзноманигорон ба ҳар гуна иттилоот бе мамониат бояд сурат гирад. Бо вуҷуди ин ҳама, мо аз муассиса бо руҳи болида баромадем...

Мактаб-интернати рақами 1-и шаҳри Душанбе, яке аз калонтарин муассисаҳои таълимии ҷумҳурӣ ба ҳисоб рафта, дар маҳаллаи “Гипрозем”-и пойтахт ҷойгир аст. Он соли 1972 таъсис ёфта, барои 550 нафар тарбиятгиранда пешбинӣ шудааст. Айни ҳол ин ҷо 305 нафар кӯдаки ятим, нимятим ва бепарастор таълиму тарбия мегиранд. Муассиса пурра таъмир гардида, тамоми шароитро барои таълиму тарбия дорост.
 

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

Август 2020 c.