Имрӯз - 29 октябр бо ташаббуси Иттифоқи журналистони Тоҷикистон гурӯҳи хабарнигорон ва кормандони воситаҳои ахбори оммаи мамлакат барои инъикоси ҷараёни корҳои сохтмонӣ ва шиносоӣ бо фаъолияти сохтмончиён ба мавзеи бунёди Неругоҳи барқи обии “Роғун” сафар карданд.

Ҳайати рӯзноманигору кормандони васоити ахбори омма аз нашрияҳои даврӣ ва телевизиону радиоҳои давлатию мустақили шаҳру навоҳии кишвар ҷалб гардида, 35 нафарро ташкил медиҳанд.

Бояд ёдовар шуд, ки Иттифоқи журналистони Тоҷикистон ин иқдомро бахшида ба 35-солагии Истиқлоли давлатии Ҷумҳурии Тоҷикистон амалӣ намудааст. Зимни сафар рӯзноманигорон бо мусоидати маъмурияти Неругоҳи барқи обии “Роғун” бо фаъолияти сохтмони ин иншооти муҳими аср шинос шуда, аз минтақаҳои зериобшаванда дидан хоҳанд кард.

Ҷасури ҚИЁМИДДИН, “ҶТ”