Соли 2023 Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон 328 нафар шахсони ҳуқуқӣ ва воқеии корхонаҳои бақайдгирифташударо ба ҷавобгарии маъмурӣ кашида, ба маблағи умумии 1 696 284 сомонӣ ҷарима кардааст.

Дар ин бора Раҳим Санъат Асо, сардори ин ниҳод 30-юми январ зимни нишасти хеш хабар дод.

Дар идома гуфта шуд, ки дар корхонаву объектҳои зериназоратии Хадамот соли гузашта 52 ҳодисаи нохуш ба қайд гирифта шуда, 36 нафар ҳалок ва 34 нафар ҷароҳатҳои ҷисмонӣ бардоштаанд.

- Барои роҳ додан ба қоидавайронкуниҳо нисбати 10 шахси ҳуқуқӣ, 45 шахси мансабдор ва 2 шахси воқеӣ аз тарафи комиссияҳои тафтишотӣ ҷазои маъмурӣ татбиқ гардида, ба андозаи 248 680,0 сомонӣ ҷаримабандӣ карда шуданд. Ҳамчунин, ба 70 нафар зарардида (аз ҷумла ба 36 нафар фавтида) аз тарафи корхонаҳо, иттифоқҳои касаба ва шахсони воқеӣ кумакпулӣ дар ҳаҷмӣ 6 723 145,0 сомонӣ расонида шудааст, - зикр кард ӯ.

Яҳё МАҲМАДНАБИЕВ, “ҶТ”