Ҳоло 2474 корхона ва 10944 иншоот ба қайд гирифта шудааст. Аз ҷониби кормандони нозироти давлатӣ ва нозироти назорати бехатарии саноатӣ дар вилоятҳои Суғду Хатлон ва ВМКБ дар корхона ва иншоотҳои ба қайд гирифта шуда, 93 назорати техникӣ гузаронида шуд, ки аз инҳо 80 нақшавӣ ва 13 ғайринақшавиро ташкил медиҳад.

Дар ин бора Раҳим Санъат, роҳбари Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон 12 июл зимни нишасти хабарӣ иттилоъ дод.

“Аз натиҷаи санҷишҳо муайян гардид, ки ҳарчанд қоидавайронкуниҳо нисбат ба солҳои қаблӣ коҳиш ёфта бошад ҳам, чунин амал дар фаъолияти корхонаи зериназоратӣ нигаронкунанда аст. Ҳангоми гузаронидани назоратҳои техникӣ нозирони хадамот 688 бандҳои вайронкунии санадҳои меъёрҳои ҳуқуқиро ошкор карданд. Барои бартараф кардани камбудиҳо дар корхонаҳои зерназоратӣ 93 санад-нишондод пешниҳод гардид”, – изҳор дошт номбурда.

Раҳим Санъат, ҳамчунин зикр намуд, ки дар оянда низ кормандони хадамот бо мақсади пурзӯр намудани назорати техникӣ тамоми саъю кӯшиши худро ба харҷ дода, талаботи санадҳои меъёрию ҳуқуқиро оид ба бехатарии саноатӣ дар Ҷумҳурии Тоҷикистон таъмин менамоянд.

Таҳмина ЮСУФӢ, “ҶТ”