Имрӯз, 8 июл, бахшида ба Рӯзи маъюбон ва пиронсолон дар шаҳри Ваҳдат миёни кӯдакони имконияташон маҳдуд ва кӯдакони солим бозиҳои варзишии "Офарин" баргузор шуд.

Чорабинӣ бо ташаббуси Ташкилоти ҷамъиятии "Дурахшон" ва дастгирии Бахши ҷавонон, варзиш ва сайёҳии шаҳри Ваҳдат дар толори варзишии мактаби варзишии кӯдакон ва наврасон доир гардид. Дар он ду даста: "Дӯстӣ" ва "Зафар" бо ҳам рақобат намуданд.

Дар фарҷом ба ҳар иштирокчӣ ифтихорнома супорида шуда, ба саҳмгузорони бозӣ, мураббиён Тоҷинисо ва Зарнигор, инчунин ду модар, ки дасти кӯмаки хешро ба кӯдакони имконияташон маҳдуд расониданд, сипоснома тақдим карда шуд.

Сипас, ба иштирокчиёни бозии варзишии "Офарин" аз ҳисоби Ташкилоти ҷамъиятии "Дурахшон" ширинӣ тақдим гардида, базми рақсу суруд ташкил шуд.