Ба муносибати Рӯзи Парчами давлатӣ дар маркази Вилояти Мухтори Кӯҳистони Бадахшон, шаҳри Хоруғ бо иштироки 10 ҳазор нафар кормандони идораву муассисаҳои вилоят, ҷавонону донишҷӯён ва мактаббачагон раҳпаймоӣ баргузор шуд.

Дар сафи пеш зиёда аз 400 нафар варзишгару вилосипедронон, намояндагони Раёсати кор бо ҷавонон ва варзиши вилоят бо Парчами миллӣ, нишон, шиору овезаҳо, баъди он дастаи навозадагони аркестри низомӣ, кормандони мақомоти маҳалливу сохторҳои қудратӣ аз Мактаби президентии Хоруғ то майдони Исмоили Сомонӣ роҳпаймоӣ карданд.

Иштирокдоронро Гулдаста Орумбекова, муовини раиси вилоят ба ифтихори ин ҷашни бузург таҳният гуфта, қайд намуд, ки “Парчами давлатӣ таҷассумгари хусусиятҳои таърихӣ, нишони давлатдории гузаштаи тоҷикон ва ифодакунандаи ормонҳои миллиамон маҳсуб меёбад”.

Баъд аз барномаи ҷолиби консертӣ, ки аз ҷониби аҳли фарҳанги вилоят пешкаши ҳозирин гардонда шуд, маҷлиси тантанавӣ бо иштироки раиси ВМКБ Шодихони Ҷамшед доир гардид.

Дар он раҳбарияти вилоят теъдоде аз кормандони фаъоли мақомоти маҳаллӣ, кормандони сохторҳои гуногун ва собиқадорони меҳнатро бо ифтихорнома қадрдонӣ намуд.