Дар шаш моҳи соли 2026 дар Тоҷикистон 531 садамаи нақлиётӣ ба қайд гирифта шуд, ки бар асари онҳо 287 нафар ҳалок ва 508 нафар ҷароҳат бардоштанд.

Дар ин бора имрӯз - 21 июл Рамазон Раҳимзода, вазири корҳои дохилӣ зимни нишасти хабарӣ иттилоъ дод.

Ба гуфтаи ӯ, ҳамчунин, дар ин давра дар ҷумҳурӣ 11 ҳазору 731 ҷиноят ба қайд гирифта шудааст, ки нисбат ба ҳамин давраи соли гузашта 1 ҳазору 358 ҳолат кам мебошад.

Ҳамзамон, шумораи ҳодисаҳои сӯхтор 51 ҳолат, дуздӣ 368 ҳолат ва қаллобӣ 354 ҳолат коҳиш ёфтааст.

Дар баробари ин, ҷиноятҳои содирнамудаи ноболиғон ва ҷавонон, инчунин одамкушӣ ва сӯиқасд ба он нисбат ба ҳамин давраи соли гузашта афзоиш ёфтааст.

Аз ҷумла, аз тарафи ноболиғон 405 ҳолат (63 ҳолат зиёд) ва аз сӯи ҷавонон 1 ҳазору 659 ҳолат, ки 85 ҳолат бештар нисбат ба ҳамин давраи соли гузашта ба қайд гирифта шудааст.

Гулафшон КАРИМОВА, “ҶТ”