Ҳамарӯза ҳангоми истифода аз хизматрасонии нақлиёти ҷамъиятӣ мо шоҳиди муносибати дурушт ва ғайриахлоқии бархе аз ронандагону мусофирон мегардем, ки албатта ба руҳияи одамон бетаъсир намемонад.

Боре ҳангоми ба донишгоҳ рафтан савори хатсайри № 8 гардидам. Чун ҳарвақта нақлиёт хеле серодам буд. Мусофирон базӯр рост меистоданд. Аммо пулчинак бо овози баланд одамони дар сари роҳ истодаро “Биёен, маршруткаи холӣ”, гӯён даъват мекард. Мусофирон норозигӣ баён мекарданд, аммо на ронанда ва на пулчинак аз ин парвое надоштанд, чунки барояшон муҳимтар аз ҳама пули зиёд ҷамъ кардан буд. Бояд гуфт, ки чунин ҳолат на танҳо дар як хатсайри № 8, балки қариб дар ҳама нақлиёти ҷамъиятии дохилишаҳрӣ мушоҳида мегардад.

Бо овардани автобусҳо аз дигар давлатҳо ва ташкили кортҳои нақлиётӣ ин гуна ҳолатҳо кам шуда бошад ҳам, вале рафторе, ки дар баъзе нақлиётҳои ҷамъиятӣ ба назар мерасад, ҳоло ҳам нигаронкунанда аст. Агар шумораи нақлиёти ҷамъиятиро каме дигар зиёд кунанд, шояд чунин ҳолатҳо камтар шавад. Бо чашми худам дидам, ки кондуктор ба духтаре мегуфт: “Ҳеҷ гап надорад, тоқат кун, массаж карда мебаранта”. Баъди ин духтар ба маҳалли даркориаш нарасида, бо қаҳр аз нақлиёт берун шуд. Албатта, агар ронанда ба меъёр риоя мекарду одами бисёр намегирифт, ин ҳолат намешуд. Хуб мешуд, ҳамаи ронандаҳо ва кондукторҳо, пеш аз он ки корашонро дар нақлиёти мусофиркашонӣ дар дохили шаҳр сар кунанд, аввал меъёрҳое, ки ҳар як ронанда бояд донад, омӯзанд. Барои ронандагони нақлиёти ҷамъиятӣ ва кондукторҳо дарсҳо ташкил карда шавад.

Чунин нобасомониҳо дар нақлиёти байнишаҳрӣ низ мушоҳида мешавад. Ронандагони нақлиёте, ки 6 ҷои нишаст доранд, аз 9 то 10 нафарро савор мекунанд, ки ин бехатарии ронанда ва мусофиронро зери суол мебарад.

Ронандаҳоро мебояд, пеш аз ба роҳ баромадан ҳаёти худ ва дигаронро фикр кунанду ба хотири як миқдор пули барзиёд ҷони худ ва мусофирро зери хатар нагузоранд. Аксар вақт аз меъёр баланд кардани суръати мошин, риоя накардани аломатҳои роҳ, ҳам аз ҷониби ронандагон ва ҳам аз ҷониби мусофирон, боиси сар задани ҳар гуна воқеаҳои нохуш мегардад.

Замира БОБОЕВА,
коромӯзи “ҶТ”