Баҳри сазовор пешвоз гирифтани ҷашни 30 – солагии Истиқлолияти давлатии Ҷумҳурии Тоҷикистон корҳои сохтмонӣ дар 57 иншооти таъиноти гуногун ба маблағи 38 миллиону 500 ҳазор сомонӣ идома дошта, то муҳлати муайянгардида бо сифати баланди меъморӣ мавриди истифода қарор мегиранд, - гуфт раиси ноҳияи Роштқалъа Лоиқ Назаршозода дар нишасти хабарӣ.

- Дар асоси дастуру супоришҳои бевоситаи Пешвои муаззами миллат муҳтарам Эмомалӣ Раҳмон, ки дар мулоқоти охир бо фаъолону сокинони Вилояти Мухтори Кӯҳистони Бадахшон таъкид гашт, имсол дар Роштқалъа ду мактаби типи нав бо ҳамаи шароитҳои замонавӣ барои 640 ва 400 ҷойи нишаст бунёд мешаванду сатҳи донишандӯзии толибилмони ноҳия ва иштироки фаъолонаи онҳо дар олимпиадаҳо аз аввала бештар тақвият хоҳад ёфт, - иброз намуд, раиси ноҳия.

Мувофиқи тавзеҳоти Л. Назаршозода аз ҷониби соҳибкорони маҳаллию муҳоҷирони меҳнатӣ ҳоло дар маркази ноҳия сохтмони меҳмонхонаю тарабхона ба маблағи 100 ҳазор доллари ИМА бомаром идома дорад. Бар замми ин, дар деҳаи Хидорҷеви ноҳия хонаҳои истиқоматии дуошёна бо ҷалби маблағҳои муҳоҷирони меҳнатӣ сохта мешаванд.

Дар робита ба татбиқи ҳадафи чоруми стратегии Ҳукумати кишвар- саноатикунонии босуръати мамлакат дар ноҳия корхонаҳои хурди истеҳсолӣ, аз қабили сехи дӯзандагӣ барои 100 ҷойи корӣ ба истифода дода шуда, сохтмони сехҳои коркарди мӯина дар Ҷамоати деҳоти Барвоз ва коркарди гиёҳҳои шифобахш дар маркази ноҳия идома доранд.