ё нигаронии раиси вилоят аз набудани дастаи футбол

Раиси Маҷлиси миллии Маҷлиси Олии Ҷумҳурии Тоҷикистон, президенти Федератсияи футболи Тоҷикистон муҳтарам Рустами Эмомалӣ ташаббус ва пешниҳоди федератсияи футболи Вилояти Мухтори Кӯҳистони Бадахшонро дар самти рушди соҳа дар вилоят дастгирӣ менамояд.

Дар ин бора Мирзонабот Алишер Худобердӣ, раиси ВМКБ, чанде пеш зимни машварати корӣ бо масъулини соҳаи кор бо ҷавонон ва варзиш ва дигар идораву муассисаҳои вилоятӣ ибрози назар намуда, ҳамзамон қайд кард, ки муҳтарам Рустами Эмомалӣ ба ҳайси президенти Федератсияи футболи кишвар дар бунёди майдончаҳо барои футбол ва дигар иншооти варзишии вилоят ҳиссаи арзанда дорад.

Имрӯз дар шаҳри Хоруғ як Маркази омодагии олимпӣ, мактабҳои махсуси гӯштини вилоят ва бозиҳои варзишӣ, 8 мактаби варзишӣ дар ноҳияҳои вилоят фаъолият доранд, ки дар онҳо аз рӯйи 18 намуди варзиш 3632 нафар варзишгар, аз ҷумла 668 нафар бонувон ба варзиш машғуланд. Мураббиён ва доварони муассисаҳои варзишӣ дар маркази ҷумҳурӣ – шаҳри Душанбе ҳамасола аз курсҳои такмили маҳорату малака мегузаранд. То ҳол 20 нафар мураббии муассисаҳои варзишӣ аз ин курсҳо гузашта, дар назар аст, ки моҳи июли соли равон барои мураббиёни мактабҳои варзишӣ ва доварон дар шаҳру ноҳияҳои вилоят курсҳои такмили ихтисос баргузор гарданд.

Ҳоло дар муассисаҳои варзишии вилоят 16 “Мураббии шоистаи ҷумҳурӣ”, 28 “Корманди шоистаи варзиши Тоҷикистон”, 9 “Устоди варзиши дараҷаи байналмилалӣ”, 120 “Устоди варзиши Тоҷикистон”, 124 номзад ба устоди варзиш ва 500 дорандаи дараҷаи 1-и варзишӣ ба машқдиҳӣ ва тарбияи варзишгарон машғуланд.

Зимни баррасии масъалаи рушди футбол дар Бадахшон, раиси вилоят аз он изҳори нигаронӣ кард, ки то ҳол дастаи футболи ВМКБ мавҷуд нест. Ин дар ҳолест, ки дар дастаи мунтахаби ҷумҳурӣ оид ба футбол теъдоди зиёди зодагони вилоят бозӣ мекунанд.

- Федератсияи навтаъсиси футбол дар вилоят ба тозагӣ ташкил гардида, бояд фаъолияташро ҷоннок намояд, - таъкид кард раиси ВМКБ ва ба масъулин дастур дод, ки аз 1 июни соли равон аз ҳисоби ҷавонони корхонаҳои калонтарини вилоят дастаҳои футбол ташкил карда, мусобиқаҳои варзиширо оғоз бахшанд.
Бояд гуфт, ки давоми сол аз ВМКБ 154 варзишгар аз руйи 12 намуди варзиш дар мусобиқаҳои ҷумҳуриявӣ иштирок намуда, соҳиби 73 медал, аз ҷумла 5 медали тилло, 18 нуқра ва 50 медали биринҷӣ гардиданд. Дастаи занонаи волейболбозони вилоят дар мусобиқаи ҷумҳуриявӣ барои дарёфти “Ҷоми раиси шаҳри Душанбе ” соҳиби ҷойи аввал гардида, ҷоми мусобиқаро ба вилоят овард. Мураббии мактаби махсуси бозиҳои варзишии шаҳри Хоруғ Фирӯз Шамсиддинов аз мусобиқаи Осиё дар намуди дастхобонӣ бо медали тилло шарафёб гардид.

Дар самти таъмину таҷдиди муассисаҳои таълимиву варзишии вилоят ва сертификаткунонии онҳо корҳои муайян иҷро гардиданд. Айни ҳол дар вилоят 403 иншооти варзишӣ, аз ҷумла 71 толори варзишӣ, 307 майдончаи одӣ, 11 варзишгоҳ, 3 қасри варзишии “Вастан” вуҷуд доранд. Аксарияти майдончаҳо ва толорҳои варзишӣ бо қарори раисони шаҳру ноҳияҳо ба муассисаҳои таҳсилоти умумӣ вобас-та карда шуда, дар онҳо ҳамарӯза чорабиниҳои варзишӣ аз намудҳои гӯштин, волейбол, баскетбол, тенниси рӯйи миз, футбол ва ғайра гузаронда мешаванд. Мутаассифона, баъзе иншоотҳои варзишӣ, ки солҳои охир сохта шудаанд, то ҳол ба ягон муассиса, ё маҳалла вобаста набуда, барои нигоҳубини онҳо касе масъул нест.