Федератсияи Русия барои дастгирии Барномаи ғизои мактабӣ дар Тоҷикистон ба Барномаи озуқавории ҷаҳонии (БОҶ) Созмони милали Мутаҳҳид 2 миллион доллари ИМА ба таври иловагӣ ҷудо менамояд.

Дар ин бора имрӯз зимни як нишасти матбуотӣ намояндаи сафири фавқулода ва мухтори Федератсияи Русия дар Тоҷикистон ва намоянда ва директори Барномаи озуқавории ҷаҳонии СММ дар Тоҷикистон Адҳам Мусаллам иттилоъ доданд.

Гуфта шуд, ки ин маблағ барои хариди маводи ғизоӣ тақрибан ба 2000 мактаби кишвар бо мақсади бо хӯроки гарм таъмин кардани мактаббачагон сарф карда мешавад.

Қобили қайд аст, ки Барномаи ғизои мактабӣ калонтарин лоиҳаи БОҶ дар Тоҷикистон ба шумор меравад, ки аз соли 2013 аз ҷониби Русия маблағгузорӣ мешавад. Дар доираи он хонандагони синфҳои аз 1 то 4 аз 2000 мактаби 52 шаҳру ноҳияҳои ҷумҳурӣ мунтазам бо хӯроки гарми солим таъмин карда мешаванд. Дар соли 2021 муассисаҳои таълимии Тоҷикистон ҳудуди 7 ҳазор тонна маводи ғизоӣ дарёфт карданд, ки имкон дод, ҳудуди 440 ҳазор хонандаи мактабҳо бо ғизо таъмин гарданд.