Имрӯз дар маркази хизматрасонии “Тойота Душанбе” ба дарвозабони бошгоҳи футболи “Истиқлол” ва тими миллии Тоҷикистон Рустам Ятимов калиди автомобили нави тамғаи “Toyota carolla” (соли барориаш 2023) супурда шуд.

Калиди мошинро аз ҷониби роҳбарияти бошгоҳи футболи “Истиқлол” ба Рустам Ятимов дар маросими тантанавӣ Аҳмадҷони Муҳаммад, директори генералии ширкати “Тоҷ Моторс” - дилери расмии ширкати “Тойота” дар Тоҷикистон супурд.

Ёдовар мешавем, ки Рустам бо ҳунарнамоии пурҷилояш дар ҳайати мунтахаби миллии кишвар дар бозиҳои Ҷоми Осиё-2023 дар шаҳри Давҳаи Қатар дили миллионҳо мухлисони футболро шод намуда буд ва ҳаводорони футболи кишвар гуфта буданд, ки то ба сатҳи чорякниҳоӣ баромадани тими миллии кишвар саҳми Рустам Ятимов бениҳоят бузург аст ва бояд заҳматҳояш алоҳида қадр шавад.

Қаблан расонаҳо ҳам тнавишта буданд, ки Шоҳрух Саидзода, президенти бошгоҳи “Истиқлол” – и шаҳри Душанбе ба Рустам Ятимов барои ҳунарнамоиҳои ҷолибаш дар Ҷоми Осиё -2023 автомобил туҳфа мекунад.