Президенти Федератсияи футболи Тоҷикистон муҳтарам Рустами Эмомалӣ дар бозӣ миёни мунтахабҳои Тоҷикистон ва Урдун, ки дар даври 1/4 ниҳоии Ҷоми Осиё-2023 дар шаҳри Давҳаи давлати Қатар бо ҳам рақобат мекунанд, иштирок хоҳад кард.

Дар ин бора телеграмканали расмии президенти ФФТ хабар додааст.

Иқдоми мазкур идомаи мантиқии ташаббусҳои варзишпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад. 22 январ Сарвари давлат низ дар доираи як сафари расмӣ ба Давлати Қатар бо футболбозони дастаи мунтахаби Ҷумҳурии Тоҷикистон мулоқот карда буданд.

Футболбозон ва аҳли ҷомеаи варзишии кишвар ду бурди пайдарпайи ахири тими мунтахаби кишварро дар Ҷоми Осиё-2023 самараи ин дидор ва суханони руҳиябахши Пешвои миллат унвон карда буданд.

Ёдовар мешавем, ки тими миллии Тоҷикистон оид ба футбол барои ба даври 1/4 ниҳоии Ҷоми Осиё-2023 баромадан, дар даври 1/8 ниҳоии мусобиқаи мазкур дастаи Имороти Муттаҳидаи Арабро пас аз бо ҳисоби мусовӣ – 1:1 ба анҷом расидани вақти асосии бозӣ баъди иҷрои зарбаҳои ёздаҳметра бо ҳисоби 5:3 мағлуб намуда буд.

Бозӣ миёни мунтахабҳои Тоҷикистон ва Урдун дар даври 1/4 ниҳоии Ҷоми Осиё-2023 2-юми феврал соати 14:30 бо вақти маҳаллӣ (16:30 бо вақти Душанбе) оғоз мегардад.