Имрӯз Президенти Федератсияи футболи Тоҷикистон Рустами Эмомалӣ дар остонаи бозии чаҳорякниҳоии Ҷоми Осиё-2023 дар давлати Қатар бо бозингарон, мураббиён ва ҳайати маъмурии тими миллии Тоҷикистон мулоқот кард.

Дар ин бора телеграмканали расмии президенти ФФТ иттилоъ додааст.

Бино ба манбаъ, дар меҳмонхонаи “Banyan Tree Doha” вохӯрӣ гарму самимӣ ҷараён гирифта, зимни он Президенти ФФТ Рустами Эмомалӣ ба даста барои футболи хубе, ки дар Ҷоми Осиё-2023 нишон медиҳад, изҳори сипос намуд.

“Ба даври чорякниҳоии Ҷоми Осиё роҳ ёфтан ва дар қатори ҳашт дастаи беҳтарин ҷой гирифтан, дастоварди бузурги тими миллии мост. Бо баромади худ дар Ҷоми Осиё шумо дили миллионҳо мухлисонро дар Тоҷикистон ва берун аз он ба даст овардед. Ҳоло ҳама ба дастаи мо мухлисӣ карда истодаанд. Ташаккур ба шумо барои натиҷаҳои шоён ва заҳматҳои зиёд. Имрӯз мунтахаби Тоҷикистон бо тими миллии Урдун вохӯрии душвор хоҳад дошт. Бароятон комёбӣ таманно дорам”, – иброз дошт, Рустами Эмомалӣ дар мулоқот бо тими мунтахаб.

Ёдовар мешавем, ки бозӣ миёни мунтахабҳои Тоҷикистон ва Урдун дар даври 1/4 ниҳоии Ҷоми Осиё-2023 имрӯз соати 14:30 бо вақти маҳаллӣ (16:30 бо вақти Душанбе) доир мегардад.

Тими миллии Тоҷикистон оид ба футбол барои ба даври 1/4 ниҳоии Ҷоми Осиё-2023 баромадан, дар даври 1/8 ниҳоии мусобиқаи мазкур дастаи Имороти Муттаҳидаи Арабро пас аз бо ҳисоби мусовӣ – 1:1 ба анҷом расидани вақти асосии бозӣ баъди иҷрои зарбаҳои ёздаҳметра бо ҳисоби 5:3 мағлуб намуда буд.