Президенти Федератсияи футболи Тоҷикистон, муҳтарам Рустами Эмомалӣ дастаи мунтахаби кишварро, ки дар Ҷоми Осиё - 2023 дар Доҳа бомуваффақият баромад мекунад, қадрдонӣ кард.

Дар ин бора телеграмканали шаҳрдорӣ хабар додааст.

Ба иттилои манбаъ, баъди баромадан аз гурӯҳ бо фармони Рустами Эмомалӣ ба тими миллии Тоҷикистон 300 ҳазор доллар мукофотпулӣ ҷудо гардид. Илова бар ин, президенти ФФТ пас аз пирӯзии тими миллии Тоҷикистон дар даври ҳаштякниҳоии Ҷоми Осиё-2023 бар тими Амороти Муттаҳидаи Араб (1:1, 5:3 аз рӯйи силсилаи пеналти) ба яккачини Тоҷикистон 150 ҳазор доллари дигар ҷудо намуд. Дар сурати пирӯзӣ бар тими миллии Урдун дар даври чорякниҳоии Ҷоми Осиё, мунтахаби Тоҷикистон 200 ҳазор доллари иловагӣ ба даст хоҳад овард.

Гуфта мешавад, ҳамчунин дар сурати пирӯзиҳои минбаъда дар Ҷоми Осиё-2023 ба мунтахаби Тоҷикистон мукофотҳои калон тақдим карда хоҳад шуд.

Ёдовар мешавем, ки мунтахаби Тоҷикистон барои аввалин бор дар таърихи худ дар қисми ниҳоии Ҷоми Осиё ҳунарнамоӣ дорад ва бо роҳ ёфтан ба даври чорякниҳоии мусобиқот аллакай дастоварди шоёнро дар таърихи варзиши кишвар сабт намуд.

2 феврал дар даври чорякниҳоӣ миллипӯшони кишвар бо тими миллии Урдун бозӣ мекунад. Дидори мазкур дар варзишгоҳи Аҳмад бин Алӣ баргузор шуда, соати 16:30 ба вақти Душанбе оғоз мегардад.