Соли 2019 барои нигоҳдорӣ ва таъмири роҳҳои автомобилгард аз буҷети ҷумҳуриявӣ 68,6 млн сомонӣ ва аз буҷети мақомоти иҷроияи ҳокимияти давлатии шаҳру ноҳияҳо 10 млн. 57, 9 ҳазор сомонӣ ҷудо гардида, нисбат ба соли 2018 буҷети ҷумҳуриявӣ 13,4% ва маҳаллӣ 12,2% зиёд мебошад.

Худоёрзода Худоёр Завқибек, вазири нақлиёти Ҷумҳурии Тоҷикистон ин нуктаро 29 январ зимни нишасти хабарӣ иброз дошта, дар идома гуфт: “Бо дастгирии ширкатҳою соҳибкорони ватанӣ ва аҳолӣ дар шаҳру ноҳияҳо ба маблағи 152млн. 547,2 ҳазор сомонӣ корҳои таъмиру барқарорсозии роҳҳои автомобилгард ва иншооти он иҷро гардидаанд, ки нисбат ба соли 2018 беш аз 2,0 маротиба зиёд мебошад”.

Ҳамчунин гуфта шуд, ки дар маҷмӯъ аз ҷониби муассисаҳои давлатии нигоҳдории роҳҳои автомобилгарди вазорат бо истифода аз ҳамаи сарчашмаҳои маблағгузорӣ барои таъмиру нигоҳдорӣ ҷудогардида, таъмири 1600,6км роҳ (аз ин 322,3 км асфалтпӯш ва 1278, 3 км шағалпӯшкунӣ) 202 пул бо дарозии 4683 метр ,191 қубур бо дарозии 1642 метр аз таъмири ҷории 6734,0 км роҳ гузаронида шуда, ба маблағи 152,8 ҳазор сомонӣ корҳои кабудизоркунӣ, 1293,0 ҳазор сомонӣ ба нигоҳдории нақбҳо ва дигар корҳои таъмирию нигоҳдорӣ ба анҷом расонида шуданд.