Ҷумъахонзода Ҷамшед Ҷурахон, раиси Палатаи савдо ва саноати Ҷумҳурии Тоҷикистон дар нишасти матбуотӣ 29 январ зикр намуд, бисёре аз журналистон ва фаъолони ҷомеа бар он назаранд, ки ҳамкорӣ бо Ҷумҳурии мардумии Чин хатарҳои зиёдеро ба бор меорад.

Ӯ дар шарҳи ин сухани худ гуфт, аз тарафи коршиносону мутахассисони марбутаи ватанӣ ҳамкориҳои дуҷониба санҷида мешаванд ва ба боварӣ гуфта метавонем, ки ҳамкории Палатаи савдо ва саноати Ҷумҳурии Тоҷикистон бо Ҷумҳурии мардумии Чин хеле хуб ба роҳ монда шудааст. Имрӯз Чин бо тамоми давлатҳо ҳамкорӣ дорад, аз ҷумла бо Тоҷикистон. Агар канданиҳои қиматбаҳо ва сарватҳои табии хешро тавассути сармоягузориҳои Чинӣ имрӯз мо ба роҳ намонем, боз панҷоҳ соли дигар шиштанамон лозим аст.
  
Дар идома вобаста ба масъалаи кам шудани соҳибкорон таъкид гардид, ки сабаби кам шудани соҳибкорон ин танҳо масъалаҳои андозбандӣ нест. Масъала он аст, ки имрӯз соҳибкорони мо ба баъзе паёмадҳо мутобиқ нестанд, онҳо стратегия-бизнеси худро барои 10 сол ҳадди ақал надоранд. Соҳибкор як мағоза кушод фикр мекунад, ки тамом, лекин бояд дар баробари моли дигарон моли онҳо бояд рақобатпазир бошаду дар баробари рақибони худ рақобат карда тавонад.

 Рустам ОДИНАЕВ, “ҶТ”