Телевизион ҳамеша тамошобини худро дошту дорад. Гарчанде техникаву технология рушд карда бошад ҳам, телевизион нақши худро гум накардааст . Ин аст, ки номгуи шабакаҳои телевизионӣ дар саросари ҷаҳон, аз ҷумла дар кишвари мо дар ҳоли афзоиш аст. Таъсиси чанд телевизиони соҳавӣ ва тасмим барои чанд шабакаи дигар бозгӯи ин гуфтаҳост. Вале дар ин баробар шабакаҳои телевизионии ватании мо ба як мушкилоти азиме гирифторанд. Ин ҳам бошад, камтамошобин будани онҳо.

Аз мушоҳидаҳо бармеояд, ки қисми бештари тамошобинон на ба шакабаҳои дохилӣ, баръакс ба телевизионҳои хориҷӣ майли зиёдтар доранд. Саволи матраҳ ин аст, ки чаро имрӯз бештар ба телевизионҳои хориҷӣ таваҷҷуҳ зоҳир мегардаду ба телевизионҳои дохилӣ кам? Дар матлаби мазкур талош намудем, ба он то андозае равшанӣ андозем.

Робия Сабзалиева, сокини пойтахт мегӯяд, имрӯз имкон аст, ки барномаҳои дӯстдошта ва филмҳои ҷолибро дар хона тариқи оинаи нилгун тамошо намоем. Ӯ гуфт: “Бештар филмҳои бисёрсериягиро меписандам ва онҳоро аз шабакаҳои телевизионии хориҷӣ тамошо мекунам. Гарчанде телевизионҳои тоҷик низ имрӯз рушд намуда, филму барномаҳои хуб доранд, аммо боз ҳам ба пояи телевизионҳои хориҷӣ намерасанд”.

“Ҳамасола миёни донишгоҳ-ҳои кишвар озмуни ҷумҳуриявии “Маҳфили зарифон” гузаронида мешавад ва ин озмун тамошобини зиёд дошту он тавассути шабакаҳои телевизионӣ нишон дода мешуд. Мутаассифона, имрӯз чунин озмунҳои шавқовар дар телевизионҳои худӣ дида намешавад. Ҳамин чиз боис мегардад, ки сокинони кишвар телевизионҳои хориҷиро бештар тамошо менамоянд”, - гуфт, ҳамсуҳбати дигари мо, Хотун Ҷумабекова.

Ниссо Бабиева, сокини пойтахт бар ин назар аст, ки набудани ҳаҷв дар телевизионҳои кишвар сабаб шудааст, то дӯстдорони ин ришта бештар ба телевизионҳои хориҷӣ рӯ оранд. Ӯ гуфт: “Имрӯз ба мушоҳида мерасад, ки аксари ҳаҷвнигорон дар шабакаҳои интернетӣ ҳунари худро нишон медиҳанд. Чанд сол қабл агар хато накунам, дар муассисаи давлатии телевизиони “Сафина” се барномаи ҳаҷвӣ – “Ҳазлнюш”, “Нӯшу неш” ва “Гӯем ё нагӯем”-ро тамошо мекардем, ки бисёр диданӣ буданд. Мутаассифона, имрӯз онҳоро намебинем”.

Аз гуфтаи ҳамсуҳбатони мо низ ин мушкил ба хубӣ аён мегардад. Камтамошобинии телевизионҳои ватаниро Нуриддин Саид, раиси Кумитаи телевизион ва радиои назди Ҳукумати ҷумҳурӣ низ тасдиқ карда, доир ба ин масъала дар нишасти матбуотиаш гуфта буд, ки “мо кӯшиш мекунем, ки ин мушкилӣ роҳи ҳалли худро ёбад”.

Ҷомеашиносону коршиносон низ ба ин ақидаанд, ки шабакаҳои телевизионӣ таваҷҷуҳи бинандаи худро бояд бо барномаҳои ҷолиб ва гуфтани мушкилоти ҷомеа ҷалб намоянд, то бинанда аз тамошои он баҳравард гардида, ҳамарӯза ин гуна барномаҳоро интизор шаваду онро бо шавқ тамошо намояд.

“Телевизионҳо пеш аз ҳама бояд барномаҳои ҷалиб дошта бошанд. Пайваста бояд мушкили рӯзро баррасӣ намоянд. Каме ҳам бошад, аз мушкилоти мардум гап зананд. Бояд барномаҳое омода намоянд, ки мардум аз он сабақ гиранд. Шахсан ман ба хотире тамошо мекунам, ки барои ҳалли мушкилоти худам роҳ ёбам. Дар телевизионҳои хориҷӣ мавзӯъҳое бештар баррасӣ кардаву нишон дода мешаванд, ки аз мушкилоти мардум мегӯянд. Албатта, чунин барномаҳо тамошобини худро дорад”, - гуфт ҷомеашинос Хосият Комилава.

Ба ҳамагон маълум аст, ки имрӯз бештари нафароне, ки ба интернет дастрасӣ доранд, аз хабару воқеаҳои рӯзмара огоҳанд. Вале хуб мешавад, агар дар шабакаҳои телевизионӣ мавзӯъҳои мубрами рӯзро таҳлилу баррасӣ намоянду саривақт иттилои даркориро ба мардум расонанд. Баробари ин барномаҳои ҷолибу диданӣ таҳияву пешкаши тамошобин гардонида шавад. Дар ин сурат мо метавонем, шумораи тамошобини телевизиони ватаниро афзун созем.

Албатта, мо хулоса намекунем, ки телевизионҳои мо тамошобин надоранд. Бо вуҷуди оне ки имрӯз телевизионҳои мо барномаҳои хуби зиёде низ доранд, аммо барои боз ҳам бештар намудани шумораи тамошобинон лозим аст, ки мувофиқ ба табъу завқи мардум барномаҳо таҳия гарданд.