Саридораи геологияи назди Ҳукумати Ҷумҳурии Тоҷикистон дар шаш моҳи аввали соли 2023 омӯзиши геологии қаъри заминро тибқи “Барномаи давлатии рушди соҳаи геологияи Ҷумҳурии Тоҷикистон барои солҳои 2021-2030” идома додааст.

Дар ин бора Илҳомҷон Оймуҳаммадзода, сардори Саридораи геологияи назди Ҳукумати кишвар 27 июл зимни нишасти хабарӣ иттилоъ дода, дар идома гуфт:

- Зерсохторҳои он корҳои омӯзиши геологиро бо истифода аз маблағҳои буҷети давлатӣ аз рӯйи 27 лоиҳа бо маблағи 6 105569,0 сомонӣ дар объектҳои металҳои сиëҳ, ранга, қимматбаҳо, нодир, сангҳои худҷило ва ороишӣ, гидрогеология, геологияи муҳандисӣ ва геоэкология ба роҳ мондааст. Дар ин муддат корҳои шартномавӣ аз рӯи 149 лоиҳа ба маблағи 11 136567,0 сомонӣ ва корҳои пудратчӣ ба маблағи 85323 сомонӣ ба иҷро расонида шуд.

Дар идома гуфта шуд, ки дар маҷмуъ корҳо бо усули хоҷагидорӣ 17 156813 сомониро ташкил намуда, нисбат ба ҳамин давраи соли 2022 - 701 873, 0 сомонӣ зиëд ба иҷро расонида шудааст, ки суръати афзоиш 104 фоизро ташкил медиҳад.

Г. КАРИМОВА, “ҶТ”