ҶОМЕА
Душанбе 20 Май 2019 07:27
5434
Ҳар як падару модар қарзи худро бояд дар назди фарзанд адо намояд. Шароити хубу мусоид фароҳам оварад, то ки фарзандаш соҳиби илму маърифат, касбу ҳунар гардида, қавииродаю суботкор ба воя расад. Ба сафҳои Қувваҳои Мусаллаҳ равон кардани фарзанд низ қарзи волидон дар назди онҳо ба шумор меравад. Аз чанд модаре, ки писаронашон дар сафҳои Қувваҳои Мусаллаҳи кишвар сарбаландона хизматро адо намудаанд, бо суоли “Хизмати Модар-Ватанро то чӣ андоза барои писаратон муҳим мешуморед?” муроҷиат намудем.

Хостамоҳ ШАРИПОВА, сокини ноҳияи Нуробод:

- Тариқи васоити ахбори омма огаҳ ҳастем, ки имрӯзҳо бисёре аз фарзандони шуҷоъ ва ватандӯсти кишварамон бо азми қавӣ, бо сари баланду ҳисси бузурги ватандорӣ, довталабона ба хизмати Модар -Ватан мераванду марзу буми кишварро содиқонаву мардонавор ҳимоя менамоянд. Ман хизмати Модар-Ватанро барои фарзандони худам хело муҳим медонам. Писари ман, Розиев Фаридун ихтиёрӣ ба хизмати ҳарбӣ рафта, тӯли ду сол дар ноҳияи Панҷи вилояти Хатлон хизмати ҳарбиро адо кард. Дар он ҷо тамоми нозукиҳои зиндагиро омӯхт. Дар ин мактаби ҳаёт ба қадри Ватану модар бештар расида, ба тамоми пастию баландиҳои зиндагӣ тобовар шуд. Беҳуда нест, ки бузургон хизматро мактаби мардонагӣ меноманд. Ҳар як ҷавоне, ки ба хизмат меравад, баъди хизмат дар рафтору гуфтори ӯ ҳатман тағйироте ба чашм мерасад. Ин тағйирот дар фарзанди ман ҳам дида мешавад. Ман бо фарзандам фахр мекунам, ки бо хоҳиши худ рафта қарзи ҷавонмардиашро адо кард ва қадру қиммати волидонашро дар байни мардуми деҳа баланд бардошт.

Ватансултон РАҲИМБЕКОВА, сокини шаҳри Душанбе:

- Вақте, ки писарам донишгоҳро хатм кард, мо дар хона маслиҳат карда ӯро барои хизмати Ватан гусел кардем. Азбаски писари ман Ато Мастибеков бачаи хубу гапгир буд, ин хоҳиши моро ба ҷону дил пазируфт. Ман бо Ато сари дастурхон нишаста, модарона насиҳат кардам: “Бачам, вақте дар муддати ду сол аз хонаводаат дур мешавӣ, албатта ба мушкилӣ дучор мешавӣ, аммо бояд ба ҳама мушкилиҳо тоқат кунӣ”. Моҳҳо гузаштанд, солҳо сипарӣ шуд ва писарам хизмати Модар-Ватанро ба итмом расонид. Ман бо хурсандии зиёд хонаҳоро тозаю озода намуда, омад-омади ҷавонмардамро интизор будам. Писарамро дида хело хурсанд шудам. Аз хурсандӣ дар куртаам намеғунҷидам. Аз дастони нурониаш бӯсидам. Лаҳзае дар оғӯши якдигар истодем.

Ман хушнуд аз он шудам, ки писари ман як ҷавонмарди боқувват, бо рафтору гуфтори боз ҳам мустаҳкамтар ба назди ман баргашт. Субҳи барвақт соати 6:00 алаккай аз хоб бедор шуда, барои мо наҳорӣ тайёр кардааст. Мефахрам, бо писарам.

Хосият КАРИМОВА, сокини ноҳияи Восеъ:

- Фарзанди ман Неъматуллоҷон баъди хатми мактаби миёна ихтиёрӣ ба хизмати ҳарбӣ равон шуд. Ман аз ин амали фарзандам розӣ будам. Чун ду писар дорам, ҳардуяшон ба хости дилам амал мекунанд. Бисёр писарони гапдаро ҳастанд. Фарзанди калониям Неъматулло баъди хатми мактаби миёна ба хизмати Ватан - Модар камар баста, тӯли ду сол дар ноҳияи Мурғоби ВМКБ адои хизмат карда, баргашта омад. Пеш аз рафтан бисёр ҳалиму меҳрубон буд. Нисбат ба хоҳарону бародаронаш ва оилаамон ғамхорӣ мекард. Баъди баргаштан аз он дида бофаҳму ботамкин, бофикру масъулиятшинос шудааст. Ба бародараш доимо аз даврони дар хизмати Ватан буданаш нақл мекунад. Баъди шунидани нақлҳояш бародараш, ки ҳоло мактаби миёна мехонд, зиёд мехост, ки чун бародараш ба хизмати ҳарбӣ рафта, мактаби мардонагиро гузарад. Ҳамин тавр, писари хурдиям низ баъди хатми мактаби миёна ихтиёрӣ ба хизмати ҳарбӣ рафта, то ҳол дар хизмат аст. Ҳар гоҳ ба хабаргириаш меравем, аз хизматаш бисёр розӣ аст. Аз тағйир ёфтани фарзандонам бисёр меболам. Фахр мекунам, ки фарзандони ман барои хизмати Ватан-Модар, ҳимояи нангу номуси худашон бе ягон дудилагӣ ба сафҳои Қувваҳои Мусаллаҳи кишвар ҳозир шуданд. Ман агар 10 писари дигар ҳам медоштам, бо ҷону дил ба хизмати ҳарбӣ мефиристодам. Шукронаи тинҷиву осудагии кишвар мекунам, ки бо дастгирии бевоситаи Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон, ки тинҷиву осудагиро фароҳам овардаанд, писаронамон бо дили осуда ба хизмат мераванду бо сари баланд бармегарданд. Сад шукр, ки имрӯз ҳамаи шароити зарурӣ барои сарбозон муҳайё аст ва фарзандони мо дар ду соли хизмат аз ягон чиз танқисӣ намекашанд.


Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Май 2019 c.