ҶОМЕА
Чоршанбе 16 Октябр 2019 08:22
6467
Шаҳраки Восеъи ноҳияи Восеъ, кӯчаи Рустам Холалӣ. Роҳи мо ҷониби хонаест, ки он ҷо фарзанди шуҷои ватан генерал –майор Рустам Амакиев зиндагӣ кардааст. Раҳораҳ пеши назарам гиряи модари фарзандгумкарда меояду ба худ мегӯям, ки ҳоло модари Рустам гиря мекунад ва ба ин омода бошам. Маро гурӯҳе аз ҷавонон, бо сардории мудири Бахши кор бо ҷавонон ва варзиши ноҳия ҳамроҳӣ мекунанд. Вориди ҳавлии хонаи рақами 18 шудем. Манзили хоксорона, зери дарахти ток, болои кат зане нишастааст. Моро дидан замон одоби тоҷиконаро ба ҷо оварда, омаданамонро хушбош гуфту бо ҳаракатҳои хоси кампирона худро ба тартиб даровард. Солҳои охир фишори хун азияташ медодааст. Аз ин рӯ, каме бемадор менамуд. Ба ҳар яки мо назар карда гуфт: “Мақсадатона фаҳмидам, писаронам. Мехоҳед аз қаҳрамониҳои Рустамҷон бароятон қисса кунам”.

Вақте ба сухан оғоз кард, дар чеҳрааш осори хастагию заъфи пирӣ эҳсос намегашт. Модар меболид, модар ифтихор дошт, модар аз фарзанди қаҳрамонаш ёдоварӣ мекард. Дар суханҳои модар ҷасорати фарзанд ифода меёфт. Ҳангоми суҳбат аён буд, ки шуҷоати ин модар, аз шуҷоати як афсари сарсупурдаи ватан беш асту кам не. Инро дида, месазад, ки бори дигар ба бузургии зан – модари тоҷик аҳсан гуфт. Сарвинисо Мирҳайдарова аз писари қаҳрамонаш ёдоварӣ мекард.

Рустамҷон писари Ватан буд

- Замони нооромиҳо буд. Рустамҷон аз ман хоҳиш кард, ки ба Коллеҷи ҳарбӣ дохил шавад. Худам бо ӯ ҳамроҳ шудаму ҳуҷҷатҳояшро супоридем. Ҳама ба ман мегуфтанд, ки ту фарзандатро ба дасти худат бурда месупорӣ. Вазъият ноором аст, ӯро гирифта ба ҷанг мебаранд. Ҳамон замон гуфта будам, ки фарзанд, ки калон шуд, фарзанди Ватан мешавад. Рустамҷони ман фарзанди Ватан буд. Ӯ аз аввал орзуи хонаи боҳашамату сарват надошт. Барои он ки ӯро ман тарбия карда будам ва имрӯз аз тарбияи кардаам ифтихор мекунам. Ҳазорон нафарҳое ҳастанд, ки қасрҳои боҳашамат доранд, вале касе аз онҳо ёд намекунаду калимаи қаҳрамонро ба номашон пайванд намесозад. Ман ифтихор мекунам, ки аз Пешвои миллат сар карда, то хурду бузург писари маро қаҳрамон унвон мекунанд. Ба Пешвои миллат гуфта будам ва боз такрор мекунам, ки 10 фарзанди дигар дошта бошам ба хизмати Ватан мефиристам ва қавл медиҳам, ки фарзанди ман бошад дар ҳама ҳолат дар бари Пешвояш меистад. Агар мардуми мо мисли Рустамҷони ман худро қурбон намекарданду дар гирди Пешвои миллат муттаҳид намешуданд, ҳазорон Рустами дигарро аз даст медодем. Фарзанди ман барои шарафу номуси хоҳарону модаронашро ҳимоя кардан, ҳамеша омода буд. Тавре ки Пешвои миллат Эмомалӣ Раҳмон борҳо аз баҳри ҷонашон гузаштанду барои пароканда нашудани миллат миёни обу оташ даромаданд. Шумо фикр мекунед, ки модари Эмомалӣ Раҳмон дар ҳамон лаҳзаҳо ором хоб мекард? Ҳаргиз не! Вале ягон маротиба фарзандашро аз роҳаш нагардонд. Зеро ӯ медонист, ки фарзандашро барои миллат ба дунё овардааст ва дар баробари фарзанди ӯ будан Эмомалӣ фарзанди миллат аст, - гуфт Сарвинисо Мирҳайдарова, модари Рустам Амакиев.

Суҳбати мо сари хислатҳои ҷавонмардонаи писари шуҷои Ватан Рустам Амакиев гарм мешуд, ҳамсуҳбати мо ғайричашмдошт ба ҷониби дигар чашм духта, хитоб кард: - Муаллим як либоси сафедата пушида баъд биё! Ин сухан моро маҷбур кард, ба ҷонибе, ки ҳамсуҳбатамон менигарист, назар кунем.

- Ман аз сари кор омада истодаам. Мон, ки ду даҳан гап бо фарзандом аз қаҳрамониҳои Рустамҷон гуям. Либосҳоям ҳам бад нест ба фикрам, ҳа бачаҳо? –ҷониби мо суоломез муроҷиат кард мӯйсафеди нӯроние. Муйсафеди нӯронӣ, ки дар чеҳрааш виқору ҷавонмардиро бемушкилӣ дидан мумкин буд, падари Рустам Амакиев мебошад.

Муҳтарам Президент, маъюс нашавед!

- Вазифаи ҳар як падару модар аст, ки пеш аз ҳама фарзандро дар руҳияи ватандӯстӣ тарбия намояд. Ман имрӯз ифтихор мекунам, ки дар ин самт заррае бошад, қарзи падариамро иҷро намудаам. Рустамҷони ман аз хурдӣ меҳнатдӯст буд. Хислати хабаркашӣ дар ӯ дида намешуд. Ӯ кореро, ки ба манфиати худаш бошаду бар зарари дигарон, намекард. Аз хурдӣ орзуи шахси низомӣ шуданро дошт. Вақте ки либоси низомиро ба бар карду савганди ҳарбиро ёд кард, ба савганду либоси низомиаш хиёнат накард. Бинед, ки бо ҳамон либосҳои низомӣ қаҳрамонона ҷон супорид. Марги фарзанд барои ҳар як падару модар фоҷиа ва бисёр вазнин аст. Вале қаҳрамонона ҳалок шудан, дар роҳи ҳифзи Ватан ҷон супоридан, ифтихор аст. Ман дар вохӯрӣ бо Пешвои миллат будам, дидам, ки ӯ чӣ қадар ғамгин аст. Албатта, фарзанди ҳар яки мо ба Пешвоямон мисли фарзанд ҳисоб мешавад. Ғами ӯ дар ҳамон рӯзҳо аз мо дида зиёд буд. Ман ба ӯ гуфтам, ки муҳтарам Президент, маъюс нашавед, писари ман худро барои амнияту озодии ватан қурбон кард. Ин ватанро фарзанди ман, фарзанди ту ва фарзандони ҳамин миллат муҳофизат накунад, кӣ мекунад? Ман дар ҳар як дарсе, ки ба толибилмон медиҳам, такрор ба такрор мегӯям, ҷавонон Пешвои миллат ба шумо бовар доранд ва шумо бояд ба ин боварӣ сазовор бошед. Такрорам шавад мегуям, ки фарзанди ман намурдааст, ӯ қаҳрамон аст ва қаҳрамон ҳеҷ гоҳ намемирад. То замоне, ки мисли шумо ҷавонону ҳукуматдорон аз Рустами ман ёд мекунанд, ӯ барои ман зинда аст. Ба шумо раҳмат, ки аз писари ман ёдоварӣ мекунед, - мегӯяд Холалӣ Амакиев, падари Рустам Амакиев.

Давоми суҳбат ҳамсуҳбатони мо аз ободиҳои кишвар ҳарф заданду ба Пешвои муаззами миллат миннатдорӣ баён намуданд, ки фарзанди онҳоро ба мисли фарзанди худашон ҳурмат мекунанд. Ҳамзамон аз ҷавонон даъват ба амал оварданд, ки баҳри ҳифзи Ватан ҳамеша омода бошанд. Суҳбати мо бо дуои момаи Сарвинисо анҷом ёфт: - Худованд сафари некатон диҳад, умри дароз диҳад ва ин умрро дар роҳи ҳифзи ватан сарф кунед. Бошад, ки номатон ҳамеша бо қаҳрамонию диловарӣ ёд шаваду ифтихори падару модар бошед. Ватани мо ҳамеша тинҷу обод бошад.

Шарҳи ҳол

Амакиев Рустам Холалиевич 20.10.1974 дар ноҳияи Восеъ дар оилаи омӯзгор ба дунё омадааст. Маълумоти ибтидоӣ, аз синфи 1 то 4-ро дар мактами миёнаи №10-и шаҳраки Восеъ гирифтааст. Аз синфи 5 то синфи 8-ум дар интернати Саричашмаи ноҳияи Шӯрообод таҳсил намуда, баъди гирифтани маълумот ҳуҷҷатҳояшро ба омӯзишгоҳи касбӣ - техникии №16 супорида, онро соли 1990 бо ихтисоси машинист - трактористи соҳаи кишоварзӣ хатм намуд.

Баъди хатми омӯзишгоҳи касбӣ - техникии №16 хуҷҷатҳояшро ба Коллеҷи ҳарбии шаҳри Душанбе супорида, баъди 2 моҳ бо роҳхати коллеҷи ҳарбӣ таҳсилро дар Коллеҷи ҳарбии шаҳри Рязани Федератсияи Русия давом медиҳад. Коллеҷи мазкурро соли 1996 хатм намуда, рутбаи лейтенанти калонро мегирад.

Ҳамчун мутахассиси соҳаи ҳарбӣ фаъолияти худро ба ҳайси командири взводи Вазорати мудофиаи Ҷумҳурии Тоҷикистон оғоз намуд.

Амакиев Рустам Холалиевич дар соҳаи мудофиаи ҷумҳурӣ худро ҳамчун шахси ҷасуру матинирода ва мутахассиси касбии соҳа нишон дода тавонист. Поквиҷдонию ватандӯстӣ ва садоқат ба қасами ҳарбии ӯро ба инобат гирифта, ӯро ба вазифаҳои масъули ҳарбӣ тавсия намуданд.

Амакиев Рустам ба ҳайси ноиби ректори Донишкадаи ҳарбии шаҳри Душанбе фаъолият намуда ба донишҷӯёни ин донишкада нозукиҳои касби ҳарбиро омӯзонида шогирдони зиёдеро ба воя расонид. Баъди фаъолият дар донишкада Амакиев Рустам ҳамчун мутахассиси варзидаи соҳа ба вазифаи командири бригадаи десантии назди Вазорати мудофиаи Тоҷикистон таъин намуданд. Дар ин вазифа тӯли 6 сол фаъолият намуд. Баъдан фаъолияташро дар Донишкадаи ҳарбии назди Вазорати мудофиа ба ҳайси ноиби ректор идома дод.

Соли 2003 ба Академияи ҳарбии Федератсияи Русия дохил шуда, онро соли 2006 хатм менамояд. Баъди хатми академия ба ватан бар- гашта, фаъолияти худро дар Донишкадаи ҳарбии Ҷумҳурии Тоҷикистон идома медиҳад. Донишу малакаашро ба инобат гирифта, ӯро ба ҳайси командири бригада ба ноҳияи Рашт равон мекунанд, ки аз уҳдаи ин вазифа низ софдилона мебарояд.

Амакиев Рустам ягона шахсест, ки ҳамчун десантчӣ Академияи ҳарбии Федератсияи Русияро хатм намудааст. Ӯ 1.06.2015 ба ҳайси командири гурӯҳи “Алфа”-и Кумитаи давлатии амнияти миллии Ҷумҳурии Тоҷикистон таъин шуда, то рӯзи вафоташ дар ин вазифа фаъолият намудааст.

Амакиев Рустам ҳамчун мутахассиси варзидаи соҳа барои омӯзиши таҷрибаи давлатҳои тараққикарда ба кишварҳои Чин, Иёлоти Муттаҳидаи Амрико, Покистон, Афғонистон сафар намуда, донишҳои муосирро меомӯзад. Барои хизматҳояш Амакиев Рустам Холалиевич аз тарафи Ҳукумати Ҷумҳурии Тоҷикистон, Вазорати мудофиаи Ҷумҳурии Тоҷикистон бо ифтихорнома, медалу орденҳо сарфароз карда шудааст. Аз ҷумла, бо ордени “Ҷасорат”, “Спитамен” мушарраф гардонида шуда, баъди вафоташ бо рутбаи ҳарбии генерал - майор сарфароз шудааст. Соли 2016 Литсейи касбӣ - техникии шаҳраки Ҳулбуки ноҳияи Восеъро ба номаш гузоштанд.

Мардонагии Амакиев Рустам Холалиевич дар хотири ҳамватанон то абад боқӣ мемонад.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3

Октябр 2019 c.