22 феврал, дар меҳмонхонаи “Серена”-и шаҳри Душанбе бо ташаббуси Оҷонсии Иёлоти Муттаҳидаи Амрико оид ба рушди байналмилалӣ (USAID) дар якҷоягӣ бо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон семинари ҷумҳуриявӣ дар мавзӯи “Усули ба бемор равонагардидаи табобати бемории сил дар Ҷумҳурии Тоҷикистон” баргузор гардид.

Дар семинари мазкур 100 нафар силшинос, сиёсатмадорон ва мутахассисони соҳаи тандурустӣ, намояндагони Ҳукумати Ҷумхурии Тоҷикистон, USAID, Ташкилоти Умуммиҷаҳонии Тандурустӣ (ТУТ) намояндагони дохилию хориҷии созмонҳои байналмилалӣ ва ташкилотҳои ҷамъиятӣ дар мавзӯи мазкур мубодилаи афкор, таҷриба, дастовардҳо ва сабақҳои гирифташударо дар самти мубориза бар зидди бемории сил ва усулҳои ба бемор равонагардидаро баррасӣ намуданд.

Таъкид гардид, ки ҳадафи усули табобати ба бемор равонагардида ин табобати бемории силро дастрас, баробар ва самаранок намудан мебошад ва он, инчунин, ба таъмин намудани дастрасии баробар ва табобати амбулаторӣ ва дастгирии беморон дар ҷомеа равона шудааст. Бо таваҷҷуҳ ба талаботи шахсони алоҳида, табобати амбулаторӣ ва ғамхорӣ нисбат ба бемории сил ба онҳо имконият медиҳад, ки табобати худро берун аз беморхона гиранд ва дар баробари ин кору фаъолиятро давом диҳанд, ки ин боиси аз байн бурдани доғгузорӣ нисбати ин бемории сироятшаванда, аммо табобатшаванда мегардад.

Иштирокчиён дар семинари мазкур роҳҳои татбиқи усулҳои беҳбуд бахшидан ба ташхисҳои лабораториро баррасӣ намуда, ба масъалаҳои васеъ намудани имкониятҳои табобат ва дастгирӣ барои ҳамаи беморони сил ва васеътар намудани нақши ҷомеаи шаҳрвандӣ дар мубориза бар зидди бемории сил, аз ҷумла, дар робита бо шахсони осебпазир, таваҷҷуҳи махсус зоҳир намуданд.