ҶОМЕА
Душанбе 21 Май 2018 03:46
4146
Аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, 5 апрел, дар меҳмонхонаи “Гранд-Отел”-и шаҳри Душанбе барои кормандони воситаҳои ахбори омма вобаста ба пешгирии бемории саратони ғадуди ширӣ семинари омӯзишӣ доир гардид.

Дар кори семинар Умарзода Саида Ғайрат, муовини якуми вазири тандурустӣ ва ҳифзи иҷтимоиии аҳолии Ҷумҳурии Тоҷикистон, Парвина Мухторова, директори Маркази ҷумҳуриявии ташаккули тарзи ҳаёти солим, Фирӯза Абдуллоева, роҳбари ташкилоти ҷамъятии “Авесто” иштирок ва суханронӣ намуданд.

Умарзода Саида Ғайрат, муовини якуми вазири тандурустӣ ва ҳифзи иҷтимоиии аҳолии Ҷумҳурии Тоҷикистон, семинарро ифтитоҳ бахшида иброз дошт, ки ҳадаф аз баргузории чорабинии мазкур ҷалби рӯзноманигорон оиди инъикоси мавзуъҳои вобаста ба бемории саратон ва дар ин замина баланд бардоштани иттилоотнокии мардум вобаста ба бемории мазкур мебошад.

Дар ҷараёни семинар гуфта шуд, соҳаи саратоншиносӣ дар тамоми ҷаҳон яке аз самтҳои ниҳоят мушкил ва муҳими нигаҳдории тандурустӣ эътироф шудааст, то он дараҷа, ки имрӯз бо ишораи барномаи Ташкилоти умумиҷаҳонии тандурустӣ бемории саратон ҳамчун омилест, ки ба рушди устувори давлатҳои ҷаҳон монеа бунёд мекунад.

Дар идома иштирокчиёни дигари семинар дар мавзуъҳои “Вазъи гирифторшавии занон ба бемории саратони ғадуди ширӣ дар Тоҷикистон”, “Нақши равоншинос дар мубориза бар зидди бемории саратон дар байни занон” ва “Инъикоси дурусти роҳу воситаҳои пешгирии бемории саратон тавассути ВАО ва ба ин васила баланд бардоштани сатҳи дониши тиббии аҳолӣ” маъруза намуда, таъкид гардид, ки мушкилоти саратон дар ҷаҳон то он дараҷае расидааст, ки ҳамасола дар дунё барои мубориза зидди бемории саратон беш аз 200 млрд доллар хароҷот мешавад. Вале дар раванди дастовардҳои илми тиб вобаста ба ташхис ва табобати бемории саратон нигоҳ накарда, тибқи омори Ташкилоти умумиҷаҳонии тандурустӣ дар ҷаҳон дар заминаи гирифторшавӣ ба бемории саратон ҳамасола талафоти иқтисодӣ ба 1 трлн 160 млрд доллар мерасад.

Айни ҳол дар ҷаҳон 14,3 млн нафар гирифтори бемории саратон буда, солона беш аз 9 млн нафар дар натиҷаи гирифтор аз бемории мазкур мефавтанд. Тибқи пешгӯии мутахассисон дар соли 2025 шумораи беморони саратон ба 19 млн нафар расида, адади фавт дар пайи ин беморӣ ба 13,5 млн нафар хоҳад расид. Бино ба оморҳои мавҷуда соли 2015 дар ҷаҳон 8,8 миллион нафар аз бемории саратон, 8,1 миллион аз бемориҳои дилу рагҳои хунгард, 7,9 млн аз инсулт, 6,4 млн аз бемориҳои сирояти роҳҳои нафас, 1,6 аз диабети қанд, 1,4 млн аз бемории исҳол (диаррея), 1,4 млн аз бемориҳои рӯҳӣ, 1,4 млн аз сил, 1,3 млн аз осебу садамаҳо ва 1,1 млн нафар аз бемории ВНМО фавтидаанд.


Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3

Май 2018 c.