Бо ҳадафи амалигардонии сиёсати давлатӣ дар самти таъмини ҳуқуқу имкониятҳо оид ба тарбия, интихобу ҷобаҷогузории кадрҳои роҳбарикунандаи Ҷумҳурии Тоҷикистон аз ҳисоби занону ҷавондухтарони лаёқатманд ва дастрасии онҳо ба хизмати давлатӣ дар шаҳри Хоруғ семинари омӯзишӣ – машваратӣ гузаронида шуд.

Семенарро муовини раиси Кумитаи занон ва оилаи назди Ҳукумати Ҷумҳурии Тоҷикистон Давлатзода Зулфия барои ҷавондухтарону бонувони шаҳру ноҳияҳои ВМКБ доир намуда, дар он инчунин мавзӯҳои таъмини ҳуқуқи баробари мардону занон ҳангоми пешниҳоду таъйин намудан ба вазифаҳои роҳбарикунанда, ҷалби бештари духтарон ба таҳсил, омода намудани кадрҳои ҷавон аз ҳисоби донишҷўдухтарон, баланд бардоштани дараҷаи рақобатпазирии занҳо дар соҳаи хизмати давлатӣ, мусоидат ба болоравии маҳорату малакаи касбӣ, ҳисси масъулият ба вазифаи ишғолкарда, тарбияи ахлоқию ватандўстиву ватанпарастӣ ва дигар масоил мавриди омӯзиш қарор гирифтанд.

Зикр гашт, ки чорабинӣ дар доираи Барномаи давлатии "Тарбия, интихоб ва ҷобаҷогузории кадрҳои роҳбарикунанда Ҷумҳурии Тоҷикистон аз ҳисоби занону духтарони лаёқатманд барои солҳои 2017 – 2022” рӯи кор омада, ҷиҳати ба шуғлу кор ҷалб намудани бонувон ва пешбарӣ кардани онҳо ба вазифаи роҳбарикунанда аз тарафи Ҳукумати мамлкат минбаъд ҳам чорабиниҳои судманд роҳандозӣ мешаванд.