Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаш моҳи соли равон, 1254 ҷинояти коррупсиониро ошкор намудааст. Дар ин бора роҳбари ин ниҳод Сулаймон Султонзода зимни нишасти хабарӣ иттилоъ дод.

- Воҳидҳои ҳифзи ҳуқуқи Агентӣ дар ин давра нисбати 707 нафар шаҳрвандон 1254 ҷинояти коррупсионӣ ва иқтисодии хусусияти коррупсионидошта, инчунин бо дигар моддаҳои Кодекси ҷиноятии Ҷумҳурии Тоҷикистон ошкор намудаанд, ки 554 адади он ба гурӯҳи ҷиноятҳои вазнин шомиланд, -гуфт номбурда.

Ҳамзамон ӯ изҳор дошт, ки муфаттишони агентӣ 453 парвандаи ҷиноятиро бо дарназардошти бақия ба пешбурд қабул намуда тафтиши пешакии 364 адади онро нисбати 452 нафар ба анҷом расонидаанд.

Инчунин гуфта шуд, ки аз тарафи воҳидҳои ҳифзи ҳуқуқи агентӣ 1007 парвандаи ҳуқуқвайронкунии маъмурии хусусияии коррупсионидошта мавриди баррасӣ қарор дошта, нисбати ҳуқуқвайронкунандагон ба маблағи 1,2 миллион сомонӣ ҷарима татбиқ карда шудааст.