ё чаро ба фарҳанги бегона тақлид мекунем?

Чанде пеш дар шабакаи иҷтимоии Instagram аз ҷониби як блогердухтари тоҷик Манижа Назарова наворе пахш карда шуд, ки барои ҷомеаи имрӯза қобили пазириш нест.

Номбурда 27 ноябр дар тӯйи хоҳараш бо шамшер пул ҷамъоварӣ карда, онро ба навор гирифта, дар саҳифаи Instagram-и худ паҳн намуд. Дар натиҷа бисёре аз истифодабарандагони шабакаҳои иҷтимоӣ ин амали мавсуфро тақлид ба фарҳанги бегона гуфтанд. Истифодаи шамшер ва бо он пулҷамъкунӣ аслан дар тую маракаҳои мардуми Қафқози Русия маъмул аст.

Ин амали Манижа дар ҳолест, ки қонунгузории кишвар чунин кирдорҳоро манъ намудааст. Ҳамин аст, ки баъди нашри мавод Манижаро ба мақомоти дахлдор даъват карда, баёноташро гирифтанд.

Вобаста ба ин Афшини Муқим, сухангӯи Кумитаи дин, танзими анъана ва ҷашну маросим дар суҳбат оид ба навори мазкур гуфт, ки Манижа Назарова аз кори кардаи худ пушаймон шуда, барои риоя накардани талаботи Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон”, тибқи моддаи 13, қисми 3 ба ӯ огоҳӣ дода шуд.

Баъди аз суҳбат бо масъулини Кумитаи дин, танзими анъана ва ҷашну маросим ин блогери тоҷик дар як навори дигар гуфт, ки аз кори кардаи худ пушаймон асту дигар чунин рафторро такрор намекунад.

Албатта, ворид шудани унсурҳои пешқадами фарҳанги бегона ба фарҳанги миллӣ падидаи номатлуб нест, ба шарте, ки талаботҳои муҳими моддӣ ва маънавиро қонеъ гардонанд. Дар сурате, ки унсурҳои фарҳанги бегона ба заифгардӣ ва азбайнравии фарҳанги миллӣ таҳдид намуда, боиси хароҷотҳои беҳуда ва исрофкориҳои шаҳрвандон мегарданд, бояд бо роҳҳои муассир ва қонунию замонавӣ пешгирӣ карда шаванд.

- Дар пешгирии воридшавии унсурҳои бегонаи фарҳангӣ ба фарҳанги миллӣ, пеш аз ҳама нақши оила калон аст. Бояд волидайн ва хешовандони калонсол ба ҷавонон корҳои фаҳмондадиҳӣ гузаронанд ва монеи он шаванд, ки фарзандонашон ба амалу рафтори барои фарҳанги мо бегона даст назананд. Дар ин самт омӯзгорон, раисони маҳалла, рӯҳониён, журналистон ва дигар ашхоси фаъол бо роҳи фаҳмондадиҳӣ ва ташвиқу тарғиби фарҳанги миллӣ нақш гузошта метавонанд. Ба ҳамин роҳҳо метавон мушкилиро ҳал кард, - афзуд Ф. Миров.

Ҷамолиддин Фахриддин, сокини пойтахт, яке аз истифодабарандагони фаъоли шабакаҳои иҷтимоӣ низ бар он аст, ки “аслан дар урфу одати мардуми мо анъанае роиҷ аст, ки ҳангоми ворид шудани домод хешовандони арӯс ва ё дугонаҳои он роҳи даромади домодро ба ҳуҷраи арӯс мебанданд ва тибқи анъана аз домод ягон маблағе меситонанду роҳро мекушоянд. Шояд ин анъанаи мардумӣ мувофиқи талабот ва ё қонуни танзими анъана ва ҷашну маросим мамнуъ бошад. Вале аз он ки Манижа Назарова пеши роҳи домодро бо шамшер баста, аз ӯ тақозо мекунад, ки аввал дами ин шамшерро бо пул пур кунад ва домод аз ҷайбаш пул бароварда, дар дами шамшер то пур шудани он овезон мекунад, ин албатта ба фарҳанги мо хос нест. Зеро дар чандин наворҳои шабакаҳои иҷтимоӣ дида будам, ки дигар миллатҳо бо чунин тарз, яъне бо шамшер пеши роҳи домодро мебаданд. Ин албатта, тақлид ба фарҳанги бегона аст. Ва ҳамин аст, ки ахиран Кумитаи дин вобаста ба амали Манижа вокуниш ҳам кард”, - иброз намуд Ҷ. Фахриддин.