4-5 июли соли ҷорӣ Сарвазири мамлакат Қоҳир Расулзода дар шаҳру ноҳияҳои вилояти Суғд бо ҷараёни корҳои бартарафсозии оқибатҳои офатҳои табиӣ шинос шуд.

Сарвазири мамлакат аз маҳалли бунёди манзилҳои нав барои зарардидагони офати табиӣ дар деҳоти Халифа Ҳасани шаҳри Панҷакент  дидан намуд.

Иттилоъ дода шуд, ки бар асари боришоти зиёд ва омадани сел дар ин деҳот беш аз 15 манзили сокинон пурра ва қисман хароб гардида, ба хоҷагиҳои шаҳри Панҷакент зарари калон расонид.Бар асари ин офати табиӣ ҳамчунин як қисм роҳу купрукҳо харобу корношоям шудаанд.

Дар мавзеи Хамиртеппаи шаҳри Панҷакент айни замон бо дастур ва роҳнамоии Президенти Ҷумҳурии Тоҷикистон, Пешвои миллат, мӯҳтарам Эмомалӣ Раҳмон бунёди манзилҳои нав ва барқарорсозии қисматҳои харобгардидаи роҳу купрукҳо идома доранд.

Бино ба иттилои масъулини соҳа то 1 августи соли равон бунёди манзилҳои нав барои зарардидагони офатҳои табиӣ ба анҷом расонида мешавад.

Дар идомаи сафар ба вилояти Суғд Сарвазири мамлакат Қоҳир Расулзода ҳамчунин дар ноҳияҳои Айнӣ ва Ашт бо рафти бартарафсозии оқибатҳои офатҳои табиӣ  ноҳия шинос шуд.

Маврид ба зикр аст, ки дар ноҳияи Ашт офатҳои табиӣ асосан ба роҳу купрукҳо, манзилҳои истиқоматӣ ва иншоотҳои ёрирасон, инчунин ба хатҳои барқу оби нӯшокӣ зарари зиёд ворид намуд.

Мувофиқи маълумоти пешакии Ситоди ҳолатҳои фавқулодда дар ноҳия бар асари баланд шудани сатҳи оби сой дар деҳоти Ашт чор манзили истиқоматӣ пурра ва 9 манзили истиқоматии дигар қисман хароб гардида, роҳи маҳаллии байни деҳаҳо дар масофаи 13 км корношоям гаштааст.

Сарвазири мамлакат зимни шиносоӣ аз ҳолати корҳои барқарорсозии офати табиӣ ба роҳбарони вазорату идораҳои дахлдор  оид ба сари вақт иҷро гардидани дастуру супоришҳои Президенти Ҷумҳурии Тоҷикистон, Пешвои миллат мӯҳтарам Эмомалӣ Раҳмон супоришҳо дод.