ҶОМЕА
Ҷумъа 29 Март 2024 06:35
Таҳти ҳамин унвон бегоҳи 30 сентябр дар Китобхонаи миллии Тоҷикистон маҳфили адабӣ баргузор гардид. Чорабинӣ бо ташаббуси Раёсати кор бо ҷавонон ва варзиши шаҳри Душанбе, дар ҳамкорӣ бо “Маҳфили адибони ҷавони навқаламу эҷодкор” ва Китобхонаи миллии Тоҷикистон баргузор гашта, дар он намояндагони Мақомоти иҷроияи ҳокимияти давлатии шаҳри Душанбе, Кумитаи кор бо ҷавонон ва варзиши назди Ҳукумати Тоҷикистон, , адибони ҷавон ва ғолибону иштирокчиёни озмуни ҷумҳуриявии “Фуруғи субҳи доноӣ китоб аст” иштирок доштанд.
Дар ҷараёни чорабинӣ сардори Раёсати кор бо ҷавонон ва варзиши шаҳри Душанбе Шоҳзод Раҳимзода баромад намуда, қайд кард, ки озмуни “Фурӯғи субҳи дононӣ...” бо мақсади ҷалби наврасону ҷавонон ва аҳли зиёи мамлакат, махсусан кормандони ҷавони вазорату идораҳои кишвар ба мутолиаи китоб, китобдӯстиву китобхонӣ ва аз ҳама муҳим, шинос шудан ба ашъори адибони классику муосири тоҷик ва баҳравар гардидан онҳо ташкил ва гузаронида мешавад.
- Ба хотири таъмини шароити арзандаву устувор, боз ҳам фароҳам овардани дастовардҳои илмии кишвар, рушди нерӯи зеҳнии ҷавонони мамлакат, имрӯз бо дастгирии бевоситаи Ҳукумати кишвар, махсусан Пешвои миллат муҳтарам Эмомалӣ Раҳмон дар тамоми ташкилоту муассиса, вазорату идораҳо ва корхонаҳои кишвар китобхонаҳо таъсис дода шудааст, ки ин бори дигар аз соҳибмаърифату соҳибилм ва дубора ба китоб рӯ овардани насли хуштолеи миллат ва ҳамчунин ғанӣ гардонидани ақалияти зеҳнӣ ва ҷаҳони маънавии наврасону ҷавонон шаҳодат медиҳад.
Муовини раиси Кумитаи кор бо ҷавонон ва варзиши назди Ҳукумати Тоҷикистон Дилноза Аҳмадзода изҳори умедворӣ намуд, ки дар оянда кори маҳфили “Шоме дар китобхона...” боз ҳам ҷоннок гардида, дар даври сеюми озмуни “Фурӯғи субҳи доноӣ китоб аст”, сафи ғолибон аз ҳисоби аъзоёни маҳфил зиёд хоҳад шуд.
- Доимоамалкунанда будани маҳфили мазкур ва ҷалби зиёди нафарони хоҳишманд шаҳодати он аст, ки имрӯз ҷавонони мо майли дубораи мутолиаи китобро доранд,- гуфт, Дилноза Аҳмадзода.
Ҳамчунин, муовини директори Китобхонаи миллии Тоҷикистон Ҷамолиддин Нуров таъкид дошт, ки бо баргузории озмуни мазкур иштирокчиён ва ғолибони он ҳам соҳиби мукофоти пуливу ифтихорнома ва ҳам соҳиби илму маърифт мегарданд.
Дар навбати худ ғолиби озмуни ҷумҳуриявии озмуни “Фурӯғи субҳи доноӣ китоб аст” дар соли 2019 Шукрона Хуҷамқулова дар мавриди нақши баргузории озмуни мазкур дар ҳаёти ҷавонон гуфт, ки он бо мақсади дарёфти чеҳраҳои нави сухандону суханвар, баланд бардоштани худшиносии миллӣ ва инчунин, инкишофи суханвариву эҷодӣ дар байни ҷавонон ва умуман, мардум гузаронида мешавад.
Бояд гуфт, ки бо мақсади сазовор истиқбол гирифтани 30-солагии ҷашни Истиқлоли давлатии Ҷумҳурии Тоҷикистон, баланд бардошатани савияи китобхонӣ, дарёфти чеҳраҳои нави суханвару сухандон, арҷ гузоштан ба арзишҳои милливу фарҳангӣ, инкишофи қобилияти эҷодӣ, таҳкими эҳсоси худшиносиву худогоҳӣ, тақвияти ҷаҳони маънавӣ миёни аҳолии кишвар озмуни ҷумҳуриявии “Фуруғи субҳи доноӣ китоб аст” эълон гардидааст. Озмуни мазкур дар миқёси кишвар тӯли ду сол аст, ки баргузор мегардад.
Эзоҳи худро нависед