Шоми имрӯз соати 17:00 дар Қасри теннис ва маҷмааи варзиши обии шаҳри Душанбе шоми бокс доир мегардад.

Мусобиқаи мазкур бо дастгирии Ассотсиатсияи байналмилалии бокс баргузор шуда, дар он муштзанҳои мо ва инчунин муштзанҳои дигар кишварҳо ширкат мекунанд.

Дар қувваозмоии асосии шом муштзани тоҷик Баҳодур Усмонов (6-0) бо муштзани таиландӣ Манат Сопатип (10-1) барои унвони “WBO World Youth” рақобат мекунанд.

Бояд гуфт, ки дар мусобиқаи мазкур собиқ қаҳрамони ҷаҳон оид ба IBF, ҳамватани мо Шавкат Раҳимов ва президенти Ассотсиатсияи байналмилалии бокс (IBA) - Умар Назарович Кремлев меҳмонони фахрии мусобиқаи “IBA Champions Night” хоҳанд шуд.

Меҳмони мусобиқа Умар Назарович Кремлев як рӯз қабл аз набардҳо озими Душанбе гардид ва худи ҳамон рӯз Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Президенти Ассотсиатсияи байналмилалии бокс (IBA)-ро ба ҳузур пазируфтанд.

Зимни мулоқот вазъ ва дурнамои ҳамкории Тоҷикистон ва Ассотсиатсияи байналмилалии бокс баррасӣ шуд. Дар ҷараёни суҳбат доир ба мавқеи бокс дар ҷомеаи Тоҷикистон ва дурнамои рушди ин навъи варзиш дар давлати мо табодули афкор анҷом дода шуд.

Сарвари давлат иштироки фаъолонаи боксчиёни тоҷикро дар мусобиқоти мухталифи байналмилалӣ ва минтақавӣ таъкид намуда, натиҷаҳои баланди онҳоро дар солҳои охир зикр карданд. Аз ҷумла, Пешвои миллат дастовардҳои боксчиёни тоҷик дар Бозиҳои осиёиро дар шаҳри Хангжоуи Ҷумҳурии Мардумии Чин, ки дар онҳо боксчиёни мо як медали тилло ва як медали биринҷӣ ба даст оварданд, таъкид намуданд.

Ҳамчунин ба тадбирҳое, ки аз ҷониби Ҳукумати мамлакат ва Федератсияи бокси Тоҷикистон ҷиҳати рушди минбаъдаи ин намуди варзиш андешида мешаванд, таваҷҷуҳи хосса зоҳир гардид.
Ҷонибҳо аз сатҳ ва муҳтавои робитаҳо изҳори қаноатмандӣ намуда, инчунин ба ҳамкории минбаъдаи судманди Федератсияи бокси Тоҷикистон ва Ассотсиатсияи байналмилалии бокс изҳори умед карданд.

Яҳё МАҲМАДНАБИЕВ, “ҶТ”