Ба истиқболи 30 –умин солгарди Рӯзи Конститутсияи Ҷумҳурии Тоҷикистон дар ноҳияи Шуғнон се майдончаи варзишӣ мавриди баҳрабардорӣ қарор гирифтанд.

Дар расми ифтитоҳи иншооти зикргардидаи соҳаи варзиш, раиси ВМКБ Мирзонабот Алишер Худобердӣ, роҳбарияти ноҳия, намояндагони Раёсати кор бо ҷавонон ва варзиши вилоят ширкат варзиданд.

Зикр гардид, ки баъди эълони марҳилаи нави рушди ВМКБ аз ҷониби Пешвои миллат муҳтарам Эмомалӣ Раҳмон ва дар заминаи оммавигардонии варзиш, дар тамоми самтҳои хоҷагии халқи вилоят, аз он ҷумла соҳаи варзиш пешравиҳои чашмрас рӯйи кор омаданд. Дар зарфи 33 соли Истиқлоли давлатӣ бо дастгирии Ҳукумати Ҷумҳурии Тоҷикистон дар вилоят варзишгоҳи марказӣ ва маҷмааи варзишӣ дар шаҳри Хоруғ, варзишгоҳҳо дар марказҳои ноҳияҳои Ванҷу Роштқалъа ва Ишкошим, қасрҳои варзишӣ дар ноҳияҳои Дарвоз, Ванҷу Рӯшон ва бештар аз 30 толору майдончаҳои варзишӣ дар шаҳру ноҳияҳои вилоят мавриди истифода қарор дода шуданд.

Ҳоло дар қаламрави ВМКБ 415 иншооти варзишӣ, аз ҷумла як маҷмааи варзишӣ, 72 толори варзиш, 247 майдончаи одии варзишӣ, 12 варзишгоҳ, 3 қасри варзишии “Вастан”, 80 майдончаи мутобиқкардашуда фаъолият менамоянд. Дар баробари ин, дар вилоят 11 мактаби варзишӣ бо фарогирии 3814 нафар варзишгар, аз ҷумла 732 духтар амал мекунанд.

Аз он изҳори хушнудӣ карда шуд, ки бо мусоид гардидани шароити машқу тамрин, теъдоди баргузории чорабиниҳои варзишӣ низ ба маротиб афзудааст. Соли ҷорӣ варзишгарони вилоят дар мусобиқаҳои ҷумҳуриявӣ ва байналмилалӣ соҳиби 245 медал гардиданд, ки аз инҳо 65 тилло, 81 нуқра ва 99 биринҷӣ мебошанд.

Дар ояндаи наздик бошад, бо дастури Сарвари давлат муҳтарам Эмомалӣ Раҳмон то соли 2030 бунёди 81 майдонча ва 87 толори варзишӣ дар деҳаҳое, ки аз 100 хоҷагӣ зиёд доранд, ба нақша гирифта шудааст. Ин иқдом барои рушди минбаъдаи соҳа такони ҷиддӣ хоҳад гузошт.

Ҷавонони ноҳия кушодани майдончаҳои варзиширо самараи Истиқлоли меҳан хонда, омодагии худро барои иштирок дар мусобиқаҳои варзишӣ изҳор намуданд.

Садоншо ҶАНОБИЛШОЕВ, "ҶТ"