ҶОМЕА
Чоршанбе 16 Октябр 2019 08:09
6428
Одатан дар ҷамоату деҳаҳои ноҳияҳои ВМКБ пирамардон ба корҳои хоҷагидорию деҳқонӣ ҷалб шуда, рӯзро бо чунин машғулиятҳо мегузаронанд. Аммо дар шаҳри Хоруғ на ҳамаи пиронсолон ба чунин шуғл дастрасӣ доранд, алалхусус онҳое, ки дар истиқоматгоҳҳои умумӣ зиндагӣ мекунанд. Бинобар ин, аксарияти онҳо аз надоштани шуғли писандида азият мекашанд.

Суҳроб Рустамбеков, яке аз пирамардони маҳаллаи Носири Хусрави шаҳр қаблан дар идораи нашрияи мақомоти маҳаллии ҳокимияти давлатии ВМКБ, рӯзномаи “Бадахшон” ба ҳайси посбон кор кардааст. Баъди ба нафақа баромадан, давоми чанд соли охир ӯро бекориву ташвиши рӯзгор то ҳадде нороҳат намуд. Хушбахтона, имсол аз аввали оғози фасли баҳор пирамардони зиёде ихтиёрона ба кабудизоркунию ободонии маркази вилоят иқдом намуданд. Дар ин росто теъдоде аз онҳо аз тарафи Маркази будубоши рӯзона барои пиронсолону маъюбон ва шахсони дар ҳолати душвори зиндагӣ қарордоштаи шаҳр низ дастгирӣ ёфтанд. Яъне масъулини марказ барояшон роҳҳу усулҳои нави кабудизоркунии шаҳр, ҳунарҳои гуногуни сохтани ашёҳои ородиҳӣ ва дигар фаъолиятҳоро ба онҳо ёд доданд.

С. Рустамбеков ҳозир яке аз мардони соҳибҳунар ва хоксору зиндадили шаҳр аст, ки дар баробари дигар ҳамсолонаш дар корҳои ободонии маркази вилоят саҳми бориз дорад.

- Феълан мо 13 нафар пирамардони шаҳр дар як ҳафта се рӯз бо ҳам омада, дар кабудизоркунии маркази вилоят, шинондан ва нигоҳбини гулҳои ҳархела, сохтани ҳар гуна лавозимот барои гулпарварию растанипарварӣ иқдом мекунем. Ашёҳои мо асосан аз чархҳои автомобилҳои боркашу сабукрав дар шакли паррандаҳои гуногун сохта мешавад. Инчунин аз химчаҳои дарахтони сояафкан сабадҳои ҳархела сохта, бо нархҳои дастрасу арзон пешкаши мизоҷон мекунем, - гуфт Суҳроб Рустамбеков.

Куҳансол Саидмир Саидмеҳтаров низ аз ҷумлаи нафаронест, ки дар сохтани лавозимоти гуногун ва корҳои ободонии шаҳр қӯшиш дорад. Номбурда қаблан дар хатсайри сеюми шаҳрӣ ба сифати ронандаи автомобили мусофиркаш кору фаъолият намуда, то синни пирӣ ба мардум хизмат кардааст.

- Ҳоло набераам ба ҷойи банда ронанда шуда кор мекунад. Худам намехоҳам ҳайкал барин дар ҷойе истам ё ки хонашинӣ кунам, - бо лутф изҳор дошт С. Саидмеҳтаров. -То даме қувватам ҳаст, ба халқу диёрам хизмат карда, дар корҳои созандагии шаҳри Хоруғ саҳмгузорӣ мекунам.

Насратулло Туфалонов, сокини маҳаллаи Хуфак дар гузашта корманди идораи хоҷагии оби вилоят буда, аз рӯзи аввали шиносоиву ҳамкорӣ бо ҳамсинонаш хушбахт аст. Ҳозир бобои Насратулло дар корҳои ҷамъиятии шаҳр низ фаъолияти пурсамар дошта, аксаран бо пиронсолон кор мекунад.

-Беш аз се моҳ корҳои зиёдеро пиёда намудем ва ҳоло ҳам майли бештари фаъолият кардан дорем. Зеро ҳангоми ҷалб шудан ба машғулиятҳои писандида рӯз бо беҳтарин дастовардҳо ва натиҷаҳои қонеъкунанда ҷамъбаст мешавад. Ният дорем, ки маҳсулоти косибии худро дар намоишгоҳҳои гуногун муаррифӣ намуда, ба ин васила ҳамзамон ҷавононро ба сохтани навигариҳо ҳавасманд кунем, то наслҳои имрӯзу фардо дар корҳои навсозию кабудизоркунӣ бештар ташаббус дошта бошанд. Зеро дар урфият мегӯянд “ҳар давру ҳар мард”- таъкид кард Н. Туфалонов.

Адулназар Мамадкаримов, аъзои дигари пиронсолон аз ҷамоати Поршиневи ноҳияи Шуғнон мебошад. Ба гуфтаи номбурда ҳар як инсони солим қобилияти иҷро кардани корҳои зиёдеро дорад, танҳо рағбати комили шахс лозим аст, то фаъолиятҳои созанда амалӣ шаванд.

“Лавозимоти ҳархела, аз қабили гулдонҳо дар шакли паррандаҳои хонагиву ваҳширо барои таҳким бахшидани ҳиссиёту муҳаббати инсон ба табиати зинда, дарки зебоии олами зиндаи наботот, рӯҳбаланд кардани ҷавонон баҳри ҳифзу нигаҳдории муҳити зист сохтем ва умед дорем, ки дастранҷи мо ба рушди ҳунарҳои мардумӣ мусоидат хоҳад кард” - илова намуд А. Мамадкаримов.

Пиронсолон бар онанд, ки дар замони соҳибистиқлолии Ҷумҳурии Тоҷикистон шаҳри Хоруғ ба як шаҳри дилкашу назаррабо табдил ёфтааст. Аммо баҳри пайваста обод нигоҳ доштани он набояд фақат мақомоти маҳаллии шаҳр ё дигар идораҳои марбути ВМКБ иқдом кунанд, балки тамоми сокинони шаҳрро лозим аст, то Хоруғро чун нигини Бадахшон тозаю шукуфон нигоҳ доранд.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3

Октябр 2019 c.