Соли 2021 шумораи ҷиноятҳо дар ҷумҳурӣ нисбат ба соли 2020 - 658 ҳолат зиёд гардидааст.

Дар ин бора Раҳимзода Рамазон Ҳамро, вазири корҳои дохилии Ҷумҳурии Тоҷикистон зимни нишасти хабарӣ ба рӯзноманигорон иттилоъ дод.

Гуфта шуд, ки соли 2020 аз ҷониби субъектҳои бақайдгирӣ – баҳисобгирӣ 23 460 ҳолат ва дар соли 2021- 24 118 ҷиноят ба қайд гирифта шуда, аз онҳо 15563 ҷиноят аз ҷониби мақомоти корҳои дохилӣ ошкор шудааст. Дар ин давра ҷинояти одамкушӣ ва сӯиқасд ба он - 103, роҳзанӣ-38, ғоратгарӣ -138, таҷовус ба номус-52, савдои одамон-52, қасдан расонидани зарари вазнин ба саломатӣ-150, авбошӣ-1224, қаллобӣ-3263, дуздӣ-6425 ва ҷиноятҳои иқтисодӣ-3379 ҳолат ба ҳисоб гирифта шудаанд.

Ҳамчунин зикр гардид, ки дар ин давра содир намудани ҷиноят миёни ҷавонон 154 ҳолат коҳиш ёфта, аз ҷониби онҳо 4759 ҷиноят ба қайд гирифта шудааст.