Дар Ҷумҳурии Тоҷикистон шумораи занони соҳибкор ба 78 ҳазор расидааст. Дар ин бора Нигина Анварӣ, муовини вазири кишоварзии кишвар зимни чорабиние бахшида ба занони кишоварз ироа намуд.

- Айни замон дар равзани ягонаи Кумитаи андози назди Ҳукумати Ҷумҳурии Тоҷикистон 78 ҳазор зани соҳибкор ба қайд гирифта шудааст, ки 25 фоизи шумораи умумии соҳибкорони инфиридиро ташкил дода, беш аз 50 дарсади онҳо дар соҳаи кишоварзӣ фаъолият мекунанд, - гуфт ӯ.

Ҳамзамон, номбурда изҳор дошт, ки дар соли 2012 шумораи хоҷагиҳои деҳқоние, ки ба онҳо занон сарварӣ мекарданд, камтар аз 6 ҳазор буд, ки 7 фоизи шумораи умумии хоҷагии деҳқониро ташкил медод. Дар ҷамъбасти соли 2021 шумораи ин гуна хоҷагиҳо ба беш аз 39 ҳазор расида, 22 фоизи шумораи умумии хоҷагиҳои деҳқониро ташкил медиҳад.

Инчунин муовини вазири кишоварзӣ қайд намуд, ки дар ин радиф Ҳукумати Ҷумҳурии Тоҷикистон барои рушди соҳаи соҳибкории кишоварзӣ барномаҳоеро рӯи даст гирифтааст, ки ба рушди иқтисодиёти кишвар низ мусодиат менамояд.