Давоми соли 2023 аз тарафи кормандони корхонаҳои тобеи Корхонаи воҳиди давлатии “Хоҷагии манзилию коммуналӣ” воқеъ дар шаҳру ноҳияҳои кишвар ба мардум хизматҳои гуногуни коммуналӣ ба маблағи 207 млн. 823, 3 ҳазор сомонӣ расонида шудааст, ки ин нисбати соли гузашта 5 млн. 445,1 ҳазор сомонӣ зиёд буда, суръати афзоиши он 102,7 фоизро ташкил медиҳад.

Давлатзода Усмон, директори генералии Корхонаи воҳиди давлатии “Хоҷагии манзилию коммуналӣ” 29-уми январ зимни нишасти матбуотӣ дар ин бора ибрози назар карда, дар идома гуфт:

- Корхонаҳои соҳаи обтаъминкунӣ ва рафъи обҳои партови тобеи КВД “Хоҷагии манзилию коммуналӣ” соли гузашта таъминоти оби нӯшокиро ба истифодабарандагон ба миқдори 59 млн. 966 ҳазор метри мукааб расонида, 20 млн. 532,7 ҳазор метри мукааб баровардани партовобҳои онҳоро таъмин намуданд. Маблағи хизматрасонӣ 103 млн. 209 ҳазор сомониро дар бар мегирад.