ҶОМЕА
Якшанбе 20 Сентябр 2020 01:22
3753
Имрӯз ҷавонон ҳамчун қишри фаъоли ҷомеа дар пешрафту шукуфоии ин меҳан саҳми арзанда гузошта истодаанд. Ин худ аз он дарак медиҳад, ки насли ҷавони имрӯза бо руҳияи хуби созанда ва бо назари нек ба оянда менигаранду ҳар яке дар соҳаи худ паи талош аст. Ҳамин гуна фаъолии ҷавонон буд, ки бо дарназардошти саҳми онҳо дар рушди ҷомеа ва иштироки фаъолонаи онҳо дар ҳаёти сиёсиву иқтисодии мамлакат аз ҷониби Пешвои муаззами миллат, муҳтарам Эмомалӣ Раҳмон соли 2017 дар Ҷумҳурии Тоҷикистон “Соли ҷавонон” эълон гардид. Зимни эълон намудани “Соли ҷавонон” Сарвари кишвар таъкид намуданд, ки “Ҷавонони мо дар ҳар ҷое, ки бошанд, бояд ҳисси баланди миллӣ дошта бошанд, бо Ватан, миллат, давлати соҳибистиқлоли худ ва забону фарҳанги миллии хеш ифтихор намоянд ва барои ҳимояи онҳо ҳамеша омода ва ҳушёру зирак бошанд. Ҷавонони имрӯзаи мо, яъне насли замони истиқлол аз наслҳои пешина бо савияи илму дониш, маърифату ҷаҳонбинӣ, сатҳи тафаккур ва одобу ахлоқ фарқи куллӣ доранд, ки ин ҳама боиси ифтихори мо мебошад”.

Акнун аз ин соли таърихӣ танҳо як моҳ боқӣ мондааст. Аз ин рӯ, аҳли эҷоди рӯзнома тасмим гирифтаанд, ки тавассути як савол: “Соли ҷавонон” ба Шумо чӣ дод?”, таассуроти ҷавононро аз ин сол ба нашр расонанд.

 Атобой СОБИРОВ, номзади илмҳои тиб:

- Имсол барои мардуми фарҳангсолори кишвари азизамон пурфайзу бобарор ва хотирмон хоҳад монд. Зеро соли 2017 бо ҳама муваффақияту пешравиҳо боз “Соли ҷавонон” эълон гардида буд. Дар ин замина, саҳми ҷавонон дар рушди ҷомеа ва иштироки фаъолона дар ҳаёти сиёсиву иқтисодии кишвари азизамон назаррас гаштааст. Ҷавонони мо бо фаъолияти софдилонаю содиқона, ҳисси баланди миллӣ ва ифтихор аз Ватан, миллат, давлати соҳибистиқлоли худ, забону фарҳанги милии хеш собит сохтанд, ки ҷавонони пешрафтаанд.

Ҳукумати кишвар, алалхусус Пешвои миллат, Президенти кишвар, муҳтарам Эмомалӣ Раҳмон ташаббусу пешниҳодҳои созандаи ҷавононро ҳамеша дастгирӣ намуда, барои амалӣ гардидани онҳо имконият фароҳам меорад. Ҷавонон дар дохил ва хориҷи мамлакат, дар бахшҳои мухталиф, бахусус соҳаи тандурустӣ таҳсил карда, соҳиби касбу ихтисосҳои муосир гардида истодаанд.

Мо – ҷавонон ҷавобан ба ин ғамхориҳо бояд тамоми саъю талоши хешро ба донишандӯзӣ, интихоби касбу ҳунарҳои муосир, ободию пешрафти сарзамини аҷдодӣ, ҳимояи Ватан, рушди илму техника ва бунёдкорӣ равона сохта, барои наслҳои наврас намунаи ибрат бошем.


Шарофат МАМАНАЗАРОВА, шоираи ҷавон:

- Боиси ифтихор ва саодатмандии ҳар як ҷавони кишвари азизи мост, ки бо ибтикори Пешвои миллат соли 2017 “Соли ҷавонон” эълон гардид, ки аз ин шодиву нишот ва фараҳмандии ҳар як ҷавони тоҷик ҳадду канор надорад. Эълон шудани “Соли ҷавонон” бори дигар собит менамояд, ки Пешвои муаззами мо ба насли ояндасози Ватани маҳбубамон эътимоду боварӣ доранд.

“Соли ҷавонон” барои ман соли хотирмон ва фаромӯшношуданӣ аст. Зеро ба ифтихори “Соли ҷавонон” як шеъри шогирдонаам бо номи “Ҷавонӣ” аз тарафи сарояндаи ҷавон Борбади Бадалиён ба риштаи оҳанг дароварда сароида шуд, ки онро дар зимн пешкаши хонандагон менамоям:

Ҷавонӣ – даври шӯхӣ, даври шодӣ,
Ҷавонӣ – даври бахту дилкушодӣ.
Суруру шеърхонии ҷавонӣ,
Чӣ зебо аст андар зиндагонӣ.
Марав ту, эй ҷавонӣ, аз дили ман,
Марав, эй бахти ман, аз манзили ман.
Ҷавонӣ лаззату шаҳди ҳаёт аст,
Ҷавониҳои мо пур аз нишот аст.

Исфандиёри МИРЗО, сарояндаи ҷавон:

- Соли 2017 ҳамчун “Соли ҷавонон” барои ман саропо пур аз муваффақиятҳо буд. Чун дар роҳи санъат равонаам, маҳз бо пайки соли мазкур дар ҷодаи пешанамудаам ба дастовардҳои зиёде ноил гардидам. Ман ҳамчун насли даврони соҳибистиқлолӣ, бениҳоят хушҳолам, ки барои мо – ҷавонон имсол “Соли ҷавонон” эълон гардид.

Барои он соли мазкур бароям фаромӯшношуданист, ки бори аввал дар ин сол дар якҷоягӣ бо дигар санъаткорон ба ҳамватанонамон консерти ҳунарӣ пешниҳод намудем. Дар баробари ин, якчанд сурудҳои тоза эҷод ва сабт намудам. Яке аз рӯйдодҳои дигарам ин аст, ки аз 15 майи соли ҷорӣ ба Филармонияи давлатии Тоҷикистон ба номи Акашариф Ҷӯраев ба кор даромадам ва то имрӯз дар ин боргоҳ ба ҳайси сароянда дар ансамбли “Тарона ва рақс” кор ва фаъолият намуда истодаам.

Умуман, имсол бароям дурахши заррин дошт. Ба он хотир дурахши бештар дошт, ки дар ин сол чандин сурудҳои тоза баҳри мухлисони хеш сабт намудам ва инчунин, мақсади ягонаам ин буд, ки дар толори барҳавое баҳри мухлисони худ консерт баргузор намоям. Ин ҳадафам низ дар ҳолати иҷроиш қарор дорад. Зеро санаи 24-уми декабри соли равон дар кинотеатри “Ватан”-и шаҳри Душанбе нахустин консерти худро таҳти унвони “Фарёди ишқ” баргузор хоҳам кард.

Имрӯз баҳри мо – ҷавонон тамоми имкониятҳо муҳайёст. Аз мо танҳо талаб карда мешавад, ки ҳар лаҳзаи вақти худро самаранок истифода барему бо аз бар намудани донишу касбҳои гуногун саҳми хешро дар рушди меҳан гузорем.

Мастура МИРЗОЕВА, донишҷӯ:

- “Соли ҷавонон” аз дигар солҳо дида бароям хеле фарқкунанда буд. Зеро имсол дар тамоми соҳаҳо ба кадрҳои ҷавон таваҷҷуҳи махсус зоҳир гардида, дар баробари ин, баҳри рушду инкишофи нерӯи зеҳнии ҷавонон чорабиниҳои гуногун гузаронида шуданд, ки онҳо баҳри боз ҳам хубтару беҳтар аз бар намудани донишҳои мухталиф мусоидат намуданд. Умуман, имрӯз ба ҷавонон таваҷҷуҳ хеле хуб буда, ҷиҳати илмомӯзии онҳо тамоми имкониятҳо фароҳам оварда шудааст. Ҳамчун донишҷӯ ифтихор аз он менамоям, ки дар чунин Ватани азизу маҳбуб умр ба сар мебараму дар фазои сулҳу ваҳдат илм меомӯзам. Бениҳоят хушҳолам, ки дар баробари таҳсил баҳри дар амал татбиқ намудани донишҳои азбаркардаам аз рӯи ихтисоси худ ҷои кор пайдо намудам ва ба фаъолияти корӣ оғоз намудам. Аз ин рӯ, ҷавонон бояд ҳамеша дар талош бошанд. Чуноне ки Пешвои миллат роҷеъ ба масъалаи ҷавонон гуфтаанд: “Ҷавонон бояд аз ҳама қишрҳои ҷомеа бештар фаъол бошанд, ташаббусҳои созанда пешниҳод намоянд, рамзҳои давлатӣ, муқаддасоти миллӣ ва дастовардҳои Истиқлолиятро ҳифз кунанд, дар ҳаёти сиёсиву иҷтимоии Тоҷикистони азиз бо дасту дили гарм ва нерӯи бунёдгарона ширкат варзанд, амнияти давлат ва шарафу номуси ватандориро ҳимоя карда, худро аз ҳама хавфу хатарҳои номатлуби ҷаҳони муосир эмин нигоҳ доранд ва парчамбардори ин сарзамин, марзу бум ва кишвари муқаддасамон бошанд”.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 1 2 3 4

Сентябр 2020 c.