Дар давоми 9 моҳи соли 2022 ба Прокуратураи генералии Ҷумҳурии Тоҷикистон 6 нафар аз шиканҷа шуданашон шикоят кардаанд. Дар ин бора имрӯз, 25-уми октябр Шариф Қурбонзода Директори донишкадаи Прокуратураи генералӣ зимни баргузории конференсияи илмӣ-амалӣ таҳти унвони “Муқовимат ба шиканҷа, амалҳо ва дастовардҳо” иттилоъ дод.

Конференсияи мазкурро Прокуратураи негералии Ҷумҳурии Тоҷикистон дар якҷоягӣ бо Эътилофи ҷомеаи шаҳрвандӣ зидди шиканҷа ва беҷазоӣ роҳандозӣ намуда, ба гуфтаи ташкилкунандагон, мақсад аз баргузории он татбиқи амалии сиёсати Ҷумҳурии Тоҷикистон ҷиҳати амалисозии Нақшаи миллии амалҳо вобаста ба иҷрои тавсияҳои Кумитаи зидди шиканҷаи СММ барои солҳои 2019-2022 арзёбӣ мегардад.

Таъкид гардид, ки шиканҷа қисми таркибии сиёсати дохилӣ ва хориҷии Тоҷикистон буда, риояи ҳуқуқу озиодиҳои инсон ва шаҳрванд, аз ҷумла пешгирии шиканҷа, ҳамагуна муносибат ва ҷазои бераҳмона, ғайриинсонӣ ё таҳқиркунандаи шаъну шараф яке аз самтҳои афзалиятноки фаъолияти ниҳодҳои давлатӣ, бахусус мақомоти прокуратура маҳсуб меёбад.

Дар Ҷумҳурии Тоҷикистон ҷиҳати пешгирии шиканҷа бори аввал соли 2012 ба Кодекси ҷиноятии кишвар тағйиру иловаҳо ворид гардида, меъёри алоҳида бо номи “шиканҷа” муқаррар ва соли 2020 ҷавобгарии ҷиноятӣ барои содир намудани он пурзӯр карда шуд.