Давоми нимсолаи аввали соли равон дар шаҳру ноҳияҳои вилояти Суғд 73 ҳолати таълимоти ғайриқонунии динӣ ба қайд гирифта шуда, нисбати шахсоне, ки ба чунин амал даст задаанд, чораҳои таъсиррасонии қонунӣ андешида шудааст.

Дар ин бора зимни нишасти матбуотӣ прокурори вилояти Суғд Фурқат Хоҷазода ба рӯзноманигорон маълумот дод.

Гуфта шуд, ки дар ин давра бо мақсади иҷрои дастуру супоришҳои Пешвои миллат муҳтарам Эмомалӣ Раҳмон вазъи иҷрои қонунгузорӣ дар бораи энергетика мавриди санҷиш қарор гирифта, муайян гардид, ки қарзи истифодаи барқ дар вилоят 665,1 миллион сомониро ташкил дода, нисбат ба аввали сол 18,4 миллион сомонӣ зиёд гардидааст.

Илова гардид, ки аз натиҷаи санҷишҳо дар асоси 730 амр 103,8 миллион сомонӣ қарзи истифодаи барқ рӯёнида шуда, 981 нафар ба ҷавобгариҳои интизомӣ ва маъмурӣ кашида шуданд. 30 парвандаи ҷиноятӣ оғоз гардидааст, ки аз ин нисбати кормандони шабакаҳои барқ 18 адад барои суйиистифодаи ваколатҳои хизматӣ тасарруфи маблағҳои барқ мебошад.

С. ҚОДИРОВ, "ҶТ"