Дар шаҳри Хуҷанд зимни як ҳамоиш ба шунавандагони маҳфили омӯзишии “Ҷавонон – пайравони Пешвои миллат” шаҳодатномаи хатм супорида шуда, инчунин устодон ва шахсоне, ки давоми се моҳ ба ҷавонони фаъол роҳнамоӣ карданд, қадрдонӣ гардиданд.

Чорабинӣ бо ҳузури Муҳаммадтолиб Шокирзода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Зуфар Исмоилзода, муовини раиси вилояти Суғд баргузор гардида, зимни он гуфта шуд, ки маҳфили мазкур дар самти баланд бардоштани худшиносии миллӣ, ҷаҳонбинии сиёсӣ ва масъулияти шаҳрвандии ҷавонон мусоидат мекунад.

Ҳамзамон иброз гардид, ки дар вилояти Суғд бо мақсади татбиқи сиёсати давлатии ҷавонон, дастгирӣ ва ҳавасмандсозии ҷавонони фаъол тадбирҳои судманд андешида шуда, маҳфили омӯзишии “Ҷавонон – пайравони Пешвои миллат” дар такмили донишу малакаи ҷавонон ва омӯзиши мактаби давлатдории Пешвои миллат амри муҳим аст. Баромадкунандагон илова намуданд, ки роҳнамоӣ ва дастгирии Пешвои миллат барои ҷавонон имкониятҳои васеи таҳсил, рушди истеъдод, иштироки фаъолона дар ҳаёти ҷамъиятӣ ва омодасозии кадрҳои ҷавонро фароҳам меоварад.

Дар анҷоми ҳамоиш ба шунавандагони маҳфил, ки аз моҳи сентябр то моҳи декабри соли 2025 ба он ҷалб гардида буданд, шаҳодатномаҳои хатм супорида шуданд. Интизор меравад, ки моҳи феврали соли равон ҷавонони лаёқатманд ба маҳфили омӯзишии “Ҷавонон – пайравони Пешвои миллат” ҷалб карда шаванд.

Ҳадаф аз он тарбияи кадрҳои ҷавон, лаёқатманд, омода намудани мутахассисон барои фаъолият дар вазифаҳои роҳбарикунанда ва саҳмгузорӣ дар рушди Тоҷикистони соҳибистиқлол маънидод мегардад.

Субҳиддин ҚОДИРОВ, “ҶТ”