Ба муносибати 25-солагии Истиқлолияти давлатӣ дар вилояти Суғд озмуни вилоятӣ таҳти унвони “Адрасбофи беҳтарин” гузаронида мешавад.

Мақсад аз баргузории озмун байни бонувон тарғиби фарҳанги либоси миллӣ, эҳё ва рушди ҳунарҳои мардумӣ, истеҳсоли матои атлас ва адрас, дарёфти беҳтарин ҳунармандони ҳунарҳои дастии адрасбофӣ ва бо ҷои кор таъмин намудани занон арзёбӣ гардид.

Озмун аз рӯи шартҳои зерин доир мешавад:

- бофандаи моҳир (ҳарчи бештар бофтани адрас дар давоми як соат, 3 ҷой дар алоҳидагӣ);
- сифати беҳтарини адраси дастӣ (3 ҷой дар алоҳидагӣ);
- нақши беҳтарин, ҳалли тобиш ва обуранги адраси дастӣ (3 ҷой дар алоҳидагӣ);
- адрасбофи беҳтарин (Шоҳҷоиза).

Ҳунарманди беҳтарине, ки Шоҳҷоизаро ба даст меорад, соҳиби панҷ ҳазор сомонӣ мукофотпулӣ мегардад.
Дар бахшҳои дигар бошад, ғолибон соҳиби 1 то 3 ҳазор сомонӣ хоҳанд шуд.