1 декабр дар шаҳри Хуҷанд ва дигар шаҳру ноҳияҳои вилояти Суғд бахшида ба Рӯзи ҷаҳонии мубориза алайҳи бемории вируси норасоии масъунияти одам аксияҳои тарғиботӣ таҳти унвони "Худ ва наздикони худро аз бемории ВНМО/БПНМ эмин нигоҳ доред" баргузор гардиданд.

Аксияҳои мазкур бо мақсади баланд бардоштани сатҳи огоҳии мардум оид ба пешгирии паҳншавии бемории ВНМБ ва БПНМ гузаронида шуда, дар рафти он аз ҷониби волонтёрон дар ҷойҳои ҷамъиятӣ ва серодам ба сокинон варақаҳои иттилоотӣ оид ба роҳҳои пешгирии ин беморӣ тақсим карда шуд.

Таъкид гардид, ки зимни баргузории аксия ба ҷавонон ва сокинони касбу кори гуногуни шаҳру ноҳияҳои вилоят беш аз 10 000 адад варақаҳои тарғиботӣ тақсим карда шуда, ба аҳолӣ фаҳмонида шуд, ки ВНМО вирусест, ки ба организми инсон ворид шуда, системаи масунияти онро нобуд месозад. Аз ин рӯ, ҳар яки моро зарур аст, ки аз вируси мазкур худро эҳтиёт намоем.