Дар вилояти Суғд бо мақсади иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати бо ҷойи корӣ таъмин намудани сокинон ва беҳтарсозии сатҳи некӯаҳволии мардум, инчунин таъмини рушди соҳаи саноат ва истеҳсоли маҳсулоти рақобатпазир ва воридотивазкунанда тадбирҳои мушаххас амалӣ карда мешавад.

Бино ба таъкиди масъулин дар 8 моҳи соли равон дар шаҳру ноҳияҳои вилояти Суғд 57 адад корхонаҳои хурду бузурги саноатӣ бунёд гардида, дар натиҷа 812 нафар бо ҷойи корӣ таъмин гардидаанд.

Тавре аз шуъбаи энергетика ва саноати мақомоти иҷроияи ҳокимияти давлатии вилоят иттилоъ доданд, дар корхонаҳои нави истеҳсолӣ асосан маҳсулоти шириву гӯштӣ, қаннодӣ, сохтмонӣ, дӯзандагӣ, мебел, семент, сангҳои ороиш ва ангишт истеҳсол гардида, инчунин банду басти меваи хушк ба роҳ монда мешавад.