Дар шаш моҳи аввали соли 2020 аз ҷониби Суди Олии кишвар 7 барномаи ҳуқуқии “Мурофиа” таҳия гардида, тавассути шабакаи “Телевизиони Тоҷикистон” пешкаши тамошобинон намудааст. Ин нуқтаро раиси Суди Олӣ, Шермуҳаммад Шоҳиён дар нишасти матбуотии Суди Олӣ иброз намуданд.

Инчунин дар ҳамин давраи ҳисоботӣ тариқи шабакаи телевизиони “Ҷаҳоннамо” бо иштироки судяҳои ҷумҳурӣ 14 маротиба барномаи “Ҳуқуқи шумо” ва 18 барномаи “Додгоҳ”, ки ба кору фаъолияти мақомоти судӣ дахл доранд, таҳия ва пахш гардидааст.

Раиси Суди Олӣ афзуд, ки мақсад аз таҳияи чунин барномаҳо, пеш аз ҳама баланд бардоштани маърифати ҳуқуқии шаҳрвандон ва ба ин васила огоҳ намудани онҳо аз ҳуқуқу уҳдадориҳои хеш, инчунин боло бурдани мақоми қонун мебошад.

Бояд гуфт, ки ин гуна барномаҳои телевизионии махсус омодашаванда аз ҷониби Суди Олӣ метавонад барои огоҳии мардум, ҳамчунин кам гардидани ҷинояткорӣ миёни шаҳрвандон саҳми бориз гузорад.