ҶОМЕА
Душанбе 06 Июл 2020 11:31
1261
Дар Итифоқи нависандагон бахшида ба 110–солагии адиб, рӯзноманигор ва публитсист Тоҷӣ Усмон маҳфили ёдбуд доир гардид.

Муовини раиси Иттифоқи нависандагон Ато Мирхоҷа дар сухани ифтитоҳӣ зикр намуд, ки Тоҷӣ Усмон дар пешрафти журналистика ва адабиёти тоҷик саҳми босазо дорад. Номбурда дар вазифаҳои гуногун чун корманди ҳизбӣ ва рӯзноманигор фаъолият намудааст.

Тоҷӣ Усмон солҳои Ҷанги Бузурги Ватанӣ ба сафи артиши шӯравӣ даъват шуда, зидди истилогарони фашистӣ ҷангидааст. Азбаски алифбои ниёгонро хуб медонист, ӯро дар ҳайати вакилони Иттиҳоди Шӯравӣ барои гуфтушуниди сарони кишварҳои аҳдномаи зидди фашизми олмонӣ ба Теҳрон мебаранд. Муддати чанд соли фаъолият дар Теҳрон баробари иҷро намудани супоришҳои давлатӣ дар ҳайати котиботи вакилон, ба гирд овардани маълумот дар бораи адибаҳои форсзабон машғул мешавад.

Пас аз анҷоми ҷанг Тоҷӣ Усмон ба Ватан баргашта, нимаҳои солҳои панҷоҳуми қарни гузашта бо номи «Бисту се адиба», китобе ба табъ мерасонад. Ин асар то ҳол аҳамияти илмии худро гум накардааст.
  
Тоҷӣ Усмон аз нимаи аввали солҳои панҷоҳум то дами марг (соли 1968) дар маҷаллаи ҳаҷвии «Хорпуштак» фаъолият намудааст. Бо фелетон ва шеърҳои ҳаҷвӣ зидди муфтхӯрону бадмастон, танбалону коргурезҳо муборизаи беамон бурдааст.

Дар маҳфил олимон, адибону рӯзноманигорон ва пайвандони Тоҷӣ Усмон сухан гуфта, аз хотироти хеш нисбат ба ин шахси наҷиб ёдовар шуданд. Аз ҷумла, нависанда ва публитсист Бахтиёри Муртазо зикр намуд, ки сухани адиб чун паранда аст. Тавассути навиштаҳояш дар қалби хонандагон дар ҳар кунҷу канори кишвар ҷо гирифта, онҳоро аз олами ботинӣ ва рангини адиб бохабар месозад. Маҳз эҷоди муҳим ва таъсирбахш ба Тоҷӣ Усмон имкон дод, то ҳол дар ёди хонандагон боқӣ монад.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Июл 2020 c.