ҶОМЕА
Ҷумъа 20 Май 2022 10:16
8316
Соли 2005 бори нахуст ҳамроҳи модарам аз як деҳаи ноҳияи Рӯшони ВМКБ ба шаҳри Душанбе омадем. То ҳол ёд дорам, ки он вақт бо мошинҳои “УАЗ” сокинони деҳоти дурдаст ба шаҳр рафтуомад доштанд. Тобистон роҳ дар назарам дурудароз намуд. Зуд-зуд аз модарам пурсон мешудам, ки кай мерасем. “Сабр кун духтарам, ҳоло мерасем”, - гӯён тасаллиям мебахшид, модар. Бо сабаби роҳҳои ноҳамвору беохир дохили мошин бетоқатӣ доштам. Дар дил мегуфтам, ки кош роҳҳо таъмир шаванду мардум дигар азоби роҳро накашанд.

Ҳамин тавр, донишҷӯ шуда, ҳар сол аз Душанбе ба зодгоҳ рафта меомадам. Ба бахти мо сар аз аввали солҳои донишҷӯӣ таъмири қитъаи роҳи Душанбе - Кӯлоб Қалъаи Хумб шурӯъ гардид. Ва оҳиста - оҳиста рафту омади мардум дар тамоми фаслҳои сол барои ин мардум осон шуд.

Бешак, ин инсонро ба андешае мебарад, ки давоми 30 соли истиқлолият Тоҷикистон ба муҳимтарин дастовардҳо расид ва мушкилтарини он баромадан аз бунбасти коммуникатсионӣ буд.

Бахусус, барои мардуми Бадахшон, ки яке аз минтақаҳои дурдасти Тоҷикистон аст, масъалаи рафтуомад ҳалли худро ёфт.

Модарам аз хотираҳояш мегӯяд, ки соли 1993 Пешвои миллат муҳтарам Эмомалӣ Раҳмон дар аввалин сафари хеш ба ВМКБ зимни баромадашон таъкид намуда буданд, ки ман кӯшиш мекунам Бадахшонро ба маркази тиҷоратӣ ва макони сайёҳӣ табдил диҳам. Ва ба қавли модарам Пешвои миллат ба ин гуфтаи худ комилан вафо карданд.

Баъди сафари кории Сарвари давлат ба ин вилояти дурдаст, масъулин тасмим гирифтанд, ки шоҳроҳи Душанбе – Кӯлоб – Қалъаи хумб – Рӯшон – Хоруғ – Мурғоб – Қулмаро таъмир намоянд, то сокинони вилоят бе мушкилӣ ба маркази кишвар сафар кунанд. Ва ҳамчунин ташрифи сайёҳон низ ба ин макони афсонавӣ зиёд шавад.

Дар давоми солҳои истиқлолият дар бахши роҳсозӣ, таҷдиду барқарорсозии роҳҳои автомобилгарди вилоят ва ҷиҳати баромадан аз бунбасти коммуникатсионӣ бо ҷалби лоиҳаҳои маблағгузорӣ як қатор корҳои мушаххас ба анҷом расонида шуд. Яке аз иншооти муҳиме, ки дар тараққиёти иқтисодию иҷтимоии вилоят саҳми назаррас дорад ва вилоятро аз бунбасти коммуникатсионӣ раҳоӣ бахшида, бо давлатҳои абарқудрати ҷаҳонӣ пайваст намуд, кушодашавии ин шоҳроҳ аст.

Ба иттилои Вазорати нақлиёти Ҷумҳурии Тоҷикистон дар ин шоҳроҳ 281 адад пулҳои мошингузар мавҷуд аст. Инчунин, таҷдиди роҳи Кӯлоб – Қалъаи хумб тибқи ҷадвали рақами 5-и барнома аз соли 2004 оғоз гардида, то охири соли 2017 134,7 км роҳҳо бо маблағгузории 174,8 млн доллари амрикоӣ аз нав таҷдид гардид.

Соли 2019 корҳои лоиҳакашӣ ва омодагӣ дар доираи барномаи “Дастрасӣ ба маблағгузории сабз ва рушди деҳот” ҷиҳати таъмини устувори зидди хатарҳои офатҳои табиӣ дар қаламрави вилоят сохтмони 18 адад пул ба маблағи 20,0 млн доллари ИМА оғоз гардид.

Аз ҷумла, дар ноҳияҳои Ванҷ 8 адад пул ба масофаи 226 метр, Рӯшон 4 адад пули мошингузар ба масофаи 200 метр, Мурғоб 4 адад пули мошингузар ба масофаи 102 метр ва Дарвоз 2 адад пул ба масофаи 41 метр амалӣ гашт.

Соли 2019 бо супориши бевоситаи Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон марҳилаи якуми таҷдиди роҳи Қалъаи Хумб-Ванҷ дар мавзеи Шкев - Қалъаи хумб ба масофаи 26 км оғоз гардида, баъди ба анҷом расониданаш марҳилаи дуюми таҷдиди роҳи Қалъаи Хумб-Ванҷ оғоз гардид. Аз соли 2020 сохтмони роҳи автомобилгарди Калъаи Хумб-Ванҷ-сарҳади ноҳияи Рӯшон, ки маблағи 226,4 млн. доллари ИМА-ро ташкил медиҳад, оғоз гардид, ки ин сохтмони 93 км роҳ, 15 адад пул, 2 адад нақб ва 5 адад долонҳои зидди тармавиро дар бар мегирад.

Қайд кардан лозим аст, ки дар доираи ин барнома таҷдиди роҳҳои Лаби ҷар- Қалъаихумб, Қалъаихумб -Рӯшон, Рӯшон-Хоруғ, Сурхсангов (456 км) то маркази ноҳияи Ванҷ ва роҳи осоишгоҳи Гармчашма то соли 2020 ба нақша гирифта шуда, бо дарёфти манбаъҳои маблағгузорӣ амалӣ гардиданд.

То соли 2025 тибқи барномаи мазкур роҳҳои Хоруғ-Туқузбулоқ ба масофаи 185 км ба маблағи 31,8 миллион доллари ИМА, роҳи автомобилгарди Музкул-Мурғоб ба масофаи 126 км ба маблағи 30,3 миллион доллари ИМА, роҳи автомобилгарди Мурғоб-ағбаи Қулма ба масофаи 90 км ба маблағи 21,624 миллион доллари ИМА, роҳи автомобилгарди Хоруғ-Ишкошим ба масофаи 105,0 км ба маблағи 26,2 миллион доллари ИМА, роҳи автомобилгарди Ишкошим-Тузкул ба масофаи 210,5 км ба маблағи 52,8 миллион доллари ИМА, роҳи автомобилгарди Қалъаи Хумб -Дашти Луч ба масофаи 6,9 км ба маблағи 779,6 ҳазор доллари ИМА, бояд таъмир карда шавад.

Бо таваҷҷуҳ ба ин оморҳо бо боварии комил гуфта метавонем, ки роҳҳои дигаре, ки таъмирталабанд, асфалтпӯш шуда, мардум бе мушкилӣ ба пойтахти кишварамон рафтуомад мекунанд.


Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Май 2022 c.