ҶОМЕА
Ҷумъа 20 Сентябр 2019 08:54
3604
Аз Меҳргон ҳамчун ҷашни пайвандгари аҳду паймон, дӯстию рафоқат, меҳр ба инсон, ҷамъоварии ҳосили кишту кор ва натиҷаи заҳмати пурбори деҳқон ном мебаранд. Ба таъдики Пешвои миллат, муҳтарам Эмомалӣ Раҳмон “Меҳргон ба монанди Наврӯз таҷассумгари суннатҳои неки инсонист, ки файзу баракати хони пурнеъмати кишоварзонро инъикос менамояд. Бинобар ин, зарур аст, ки ҳар сол бо шукӯҳу шаҳомати хосса таҷлил карда шавад. Аз ин хотир, анъанаву расму ойини хос ва фарҳанги ғании мардуми тоҷик, ки аз қадимулайём бо замин сару кор доштанд ва соҳиби маданияти баланди заминдорӣ буданд, то имрӯз зинда боқӣ мондааст ва ҳамчун ҷузъи таркибии тамаддуни умумибашарӣ барои инсоният хизмат менамояд”. Бо ҳамин мақсад 15 октябри соли равон шуруъ аз саоти 9:00 дар “Боғи Ирами шаҳри Душанбе ҷашни Меҳргон – иди ҳосил, фаровонӣ ва ваҳдат, бо шукӯҳу шаҳомати хосса таҷлил гардид.

Дар маросими идона намояндагон аз Дастгоҳи иҷроияи Президенти Ҷумҳурии Тоҷикистон, Мақомоти иҷроияи ҳокимияти давлатии шаҳри Душанбе, вазоратҳои фарҳанг ва кишоварзӣ, кумитаҳои кор бо ҷавонон ва варзиш, телевизион ва радио ва намояндагони дигар сохторҳо иштирок намуданд.

Имсол дар ҷашни Меҳргон намояндагони тамоми шаҳру навоҳии мамлакат ҳосили заҳмати худро ба маърази тамошо гузошта буданд. Аз ҷумла, анвои гуногуни хӯрокҳои миллӣ, нону кулчаҳо, шириниҳои гуногун, меваю сабзавот ва дар умум, намунаи тамоми дастранҷи деҳқонони мамлакат дар рӯи дастурхон барои меҳмонон пешниҳод гардиданд, ки ҳар кадом аз хони бою таърихи куҳан доштани тоҷикон дарак медод.

Дар қисмати шарқии “Боғи Ирам” ба муносибаи иди Меҳргон барномаи консертии шавқовар манзури сокинон ва меҳмонони шаҳри Душанбе гардонида шуд. Дар барнома ҳунармандони ансамблҳои фолклории “Ганҷина”, рақсии “Лола”, Донишкадаи давлатии фарҳанг ва санъати Тоҷикистон, “Шашмақом”, “Ориё”, “Сомон” ва дигар сарояндаҳои эстрадаи кишвар ҳунарнамоӣ карданд.

Қабл аз баргузории маросими фарҳангӣ муовини сарвазири мамлакат Маҳмадтоир Зокирзода ҳозиринро ба ҷашни Меҳргон табрик гуфт. Ӯ зимни суханронии худ аз таърихи бошукӯҳи ин ҷашн ёдовар шуда иброз дошт: “Барои таъин намудани рӯзи Меҳргон ҳамаи пажуҳандагон асосан ба Берунӣ такя намудаанд. Чунки ки ӯ ҳамаи санадҳои барояш мавҷудро бо тафаккури мантиқию оқилона мавриди баррасӣ қарор додааст. Тибқи гуфтаи Берунӣ ҷашни Меҳргон 16-уми моҳи меҳр (баробари 7-8 октябр) ва “Меҳргони бузург” 21-уми меҳр (баробари 11-12 октябр) будааст. Вожаи меҳргон аз ду ҷузъ иборат буда, дар луғатномаҳо дар борааш чунин шарҳ омадааст: “меҳр” -муҳаббат, самимият, дӯстӣ ва “гон” - далел бар нисбат, яъне ба чизе мансуб будан аст”.

Ёдовар мешавем, ки бо саъю кӯшиши Президенти ҷумҷурӣ, Пешвои миллат, муҳтарам Эмомалӣ Раҳмон ҷашни Меҳргон аз нав бо тамоми шукӯҳу шаҳоматаш эҳё шуд ва ба радифи беҳтарин маросимҳои миллӣ ворид гардид. Таи чанд соли охир дар Тоҷикистон ҷашни Меҳргон дар пайвандӣ ба Истиқлолияти давлатӣ миёнаи моҳи октябр бо шукӯҳу шаҳомати хосса таҷлил мегардад. Дар доираи ин ҷашн дар тамоми бозорҳои ноҳияҳо, шаҳрҳою шаҳракҳо мардум дастовардҳои кишоварзии худро ба намоиш мегузоранд. Дар баъзе ноҳия ва шаҳрҳо намоишҳои махсуси театрӣ бахшида ба иди Меҳргон баргузор мегардад.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6

Сентябр 2019 c.