ҶОМЕА
Якшанбе 25 Сентябр 2022 07:15
8951
Тайи чанд соли охир хонандагони синфҳои якум пеш аз оғози соли нави хониш ба давраи мутобиқшавӣ ҷалб карда мешаванд. Ин иқдом бо пешниҳоди як барномаи таълимӣ аз ҷониби Вазорати маориф ва илми Ҷумҳурии Тоҷикистон ба роҳ монда шуда буд, ки дар аввал онро давраи омодагӣ ба муассисаҳои таълимӣ мегуфтанд ва дар он хонандагони синфҳои 1 ҳудуди як моҳ: аз 1 то 25 - уми август ба муассисаҳои таълимӣ ҷалб карда мешуданд. Аммо аз соли 2020 инҷониб, бо паҳншавии бемории COVID-19 дар ҷумҳурӣ, барномаи таълимие аз ҷониби мутахассиси Вазорати маориф ва илми ҷумҳурӣ Абдухолиқ Абдуллоев омода гардид, ки дар он кӯдакон тибқи барномаи давраи мутобиқшавӣ ба муҳити таълимӣ ба муддати 10 рӯз: аз 8 то 19 - уми август ба муассисаҳои таълимӣ фаро гирифта мешаванд.

Тавре аз суҳбат бо мутахассиси соҳа маълум гардид, имсол ин давра аз 8 - уми август оғоз гардид. Мақсад аз фаро гирифтани хонандагони синфҳои якум ба муассисаҳои таълимӣ ин шиносоии бевоситаи кӯдакон ба муассиса ва дар оғози таълим роҳгум назадани онҳо мебошад.

Мудири шуъбаи таҳсилоти томактабӣ ва миёнаи умумии Маркази ҷумҳуриявии таълимоти методии назди Вазорати маориф ва илми Ҷумҳурии Тоҷикистон Бой Нодиров дар мавриди ба як низоми муайян даровардани кӯдакон чунин назар дорад:

- Кӯдак аз муҳите ба муассиса ҷалб карда мешавад, ки он ҷо низом надорад. Замони хӯрдан, хобидан, бозӣ кардан дар ихтиёри худаш аст. Дар муассиса ба як низоми муайяне ворид мешавад. Ӯ бояд замони ба муассиса омадан, аз муассиса ба хона рафтан, дар кадом курсӣ нишастан ва кӣ будани омӯзгори худро донад. Мо барои омӯзгороне, ки бо хонандагони синфҳои якум машғуланд, на танҳо барнома, балки дафтари бақайдгирӣ ҳам равон мекунем, ки ин аз ҷониби Вазорати маориф ва илми Ҷумҳурии Тоҷикистон тасдиқ шудааст.

Дар мавриди роҳандозӣ ва мақсади барномаи таълимӣ мутахассис мегӯяд, ки 3 сол аст барномаи мутобиқшавӣ ба муҳити таълимиро барои хонандагони синфҳои якум омода кардаанд, ки дар он барои зуд хаста нагардидани кӯдакон аз муҳити таълимӣ чунин мавзӯъҳо ҷой дода шудаанд: шиносоӣ ба муҳити муассисаи таълимӣ, мушаххас донистани ҷои нишаст ва ҳамнишинони худ, қоидаи дар паси миз ё рӯи курсӣ дуруст нишастан, шиносоӣ бо муқаддасоти миллӣ ( Парчам, Нишон, Суруди миллӣ), саҳархезӣ ва варзиш ва ғайраҳо.

Дар барнома ҳамагӣ 30 -то машғулият ҷо дода шудааст, ки давоми 10 рӯз (ҳар рӯз 3 машғулият) бо давомнокии то 35 дақиқа гузаронида мешавад.
Ба гуфтаи ҳамсуҳбати мо ин иқдом аз ҷониби омӯзгорони муассисаҳои таълимӣ ва падару модарон хуб пазируфта шуда, дар ояндаи наздик дар назар аст, ки ҳамин барномаи таълимӣ барои хонандагони гурӯҳҳои русӣ ҳам таҳия гардад.

Аҳтам Холмуродов, падаре, ки ду фарзандаш давраи мутобиқшавӣ ба муҳити таълимро паси сар кардаанд, барои гирифтани чунин як иқдом ба Вазорати маориф ва Ҳукумати кишвар миннатдорӣ карда, мегӯяд:

- Чунин як иқдом дар ин чанд соли охир бо пешниҳоди Вазорати маориф ва дастгирии Ҳукумати мамлакат барои хонандагон бисëр хуб шуд. Чун кӯдакон бо доштани ҳофизаи қавӣ дар ин муддати каме, ки барои онҳо пешбинӣ шудааст, тибқи барномаи таълимӣ сараввал бо ҳамсабақони оянда шинос мешаванд ва пасон ҳар гӯшае аз муассисаро меомӯзанд ва дар охир дарк мекунанд, ки онҳо дигар бузург шудаанду бояд ҳамадон бошанд.

Ҳамсуҳбати мо мегӯяд, солҳои пеш вақти бори аввал аз дари муассиса даромадани кӯдак тарс тамоми вуҷудашро фаро мегирифт. Имрӯз бошад, фарзандаш ӯро давон-давон ба сӯи синфхонаи худ мекашонад, то бо ҳамсабақон ошно созад.

Гулзира Маҳмадова, нафаре, ки худ ҳам омӯзгор ва ҳам модар аст, ин давраро барои хурдтаракон чунин шарҳ медиҳад:

- Ман 22 сол боз ба тарбияи насли наврас машғулам. Баъзан мешавад, ки дар ҷавоби саволи тифлаки худ оҷиз мемонам. Вақте писари ман ба таълим дар давраи мутобиқшавӣ ҷалб шуд, дар хона сараввал оғоз шуд миқдори ҳамсабақонро шумурдан ва номҳояшонро аз ёд кардан. Пасон сар шуд бозиҳои дастаҷамъие, ки дар муассиса бо ҳамсабақон мегузарад, онҳоро тасвир кардан ва шаб бо як дунёи рангини хаёлот хобидан.

Дар муддати ин чанд рӯз ба хонандагони синфи якум чӣ омӯхтанро Садбарг Назриева, муаллимае, ки 19 соли умри худро бо кӯдакони синфҳои ибтидоӣ гузаронидаасту баъзе шогирдонаш аллакай соҳиби зиндагии мустақилона шудаанд, чунин шарҳ дод:

- Кӯдакон шиносоиро аз боғчаи муассиса оғоз намуда, пасон одоби дуруст нишастан дар синфхонаи таълимӣ, одоби дастро боло гирифтан, дар кӯчаю роҳравҳо ба калонсолон адои эҳтиром намуданро меомӯзанд.

Ба гуфтаи Садбарг Наз-риева ба кӯдакон шинохти қаҳрамонони Ҷумҳурии Тоҷикистон, шинохти Парчаму Нишони давлатӣ ва аз худ намудани Суруди миллии Ҷумҳурии Тоҷикистон низ омӯзонида мешавад, ки дар ин масъала бештар падару модарон ба фарзандони худ ëрӣ расонида, кори омӯзгоронро осон менамоянд.
Дар мавриди ҳавасманд шудани кӯдакони синфи якум Хуршед Холов, директори МТМУ №24-и ноҳияи Файзобод чунин назар дорад:

- Ҳар сол тибқи фармони вазири маориф ва илми Ҷумҳурии Тоҷикистон мо дар муассиса барои кӯдакони синфҳои якум нақшаи чорабиниҳо тартиб дода, ба дасти масъули гурӯҳ медиҳем. Ин ба монанди нақшаи таълимие, ки барои хонандагон пешбинӣ мешавад, нест, чун кӯдак бояд аз рӯзи аввали шиносоӣ бо муассиса ҳавасманд бошаду дилбазан не. Аз ҳамин сабаб, дар дохили ин дастури таълимӣ боз бозиҳои шавқоваре ҳам ҳастанд, ки кӯдакро руҳбаланд менамояд.
Аз гуфтаҳои боло бармеояд, ки ин раванди таълим аз ҷониби сокинони мамлакат хуб пазируфта шуда, онҳо аз ин иқдоми пешгирифтаи масъулин барои ҷалби хонандагони синфи аввал ба муассисаҳои таълимӣ изҳори қаноатмандӣ менамоянд.

Зуҳро РИЗОЗОДА, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Сентябр 2022 c.