Файласуфи бузург Волтер дар бораи таассуб ақидаи ҷолибе дорад. Вай чунин нигоштааст: “Таассуб натанҳо ҳосили бесаводист, балки он ҳамеша бо ҳолати равонии анбуҳи одамон робитаи ногусастанӣ дорад. Таассуб ҳамеша зулмоту бераҳмист, ҳамзамон хурофот, ҷаҳолат, кинаву адоват аст”. Ҳодисаҳои охир аз он шаҳодат медиҳанд, ки як шахси гумроҳгашта, чандин ҷавонони ба роҳи хато рафта ва зудбоварро зери фиреби худ қарор медиҳад. Ин ҳодисаҳо аз он гувоҳӣ медиҳанд, ки иддае аз ҷавонони раҳгумзада ҷони худро дар хатар гузошта, инчунин аз хатарнокии кори худ волидайну наздикони худро олуда сохта, худ ва онҳоро қурбонии корҳои ношояму ноарзанда месозанд.

Онҳо роҳеро интихоб намудаанд, ки на оғоз дораду на анҷом ва шояд худашон бехабар буданд, ки роҳи онҳо то куҷост. Ҳамаи ин натиҷаи каҷфаҳмиҳои насли наврас ва тарғиби ақидаҳои ботили хурофот ва ҷаҳолатпарастист.

Маълум мешавад, ки дар байни ҷавонони гумроҳ ва аз кори худ пушаймон на ҳамаашон шахсони бесаводанд, балки ҷавонони босаводу мутаассиб, ки ба ин кирдорҳои нопок даст мезананд. Дар роҳи худ бо дастони худ чоҳ мекананд ва аҳволи волидайнро бад мегардонанд. Ба суханони шахсони номаълуми ба кишварамон назари душманона дошта бовар карда, ба ҷои он ки аз кӯчаи илму маърифат гузашта, бо ёрии он чӣ будани ватан ва моҳияти онро бифаҳманд ва осудаҳолона ба як бурда нон қаноат карда, зиндагии хуш гузаронанд, ба ватани худ тавассути ба тафаккури онҳо ҷой кардани фикрҳои хатарнок ҳисси нафрат пайдо мекунанд.

Дар ягон қолиби фикр ва тафаккури инсон намеғунҷад, ки пайравони наҳзат ба гурӯҳҳои ифротгаронаю ғоратгарона ва пур аз ҷангу ҷидол шомил шуда, ояндаи худро ба дасти бегонагон, душманони халқу ватани худ месупоранд. Аз мисоли равшани аъмоли воқеъгаштаи ташкилоти террористии собиқ ҳизби наҳзати ислом хулосабарорӣ намуда, он нангу номусе, ки раҳгумзадагону бо роҳи хато рафтагон ба давлату кишвар оварданд, ба насли оянда дарси ибрат шавад, то теша ба решаи худ назананд. Пас, ҷавонон бояд дар хориҷи кишвар парчамбардори миллати хеш бошанд ва номи давлату миллатро ба ҷаҳониён бо сари баланд муаррифӣ намуда, рисолати ватансозӣ ва ватандории худро ба ҷо оранд.

Соиб САИД,
донишҷӯи ДТТ